Tokio—2020 Olimpiadasida oltin medalni qo‘lga kiritgan o‘zbekistonlik bokschi Bahodir Jalolovga Surxondaryo viloyati hokimligi tomonidan Skoda Kodiaq avtomobili topshirildi.
So‘nggi yillarda bokschilarga mashina yoki uy sovg‘a qilinishi yangilik emas. “Daryo” O‘zbekiston boks terma jamoasi yetakchisi shu vaqtga qadar qo‘lga kiritgan mukofotlarni sanab o‘tadi.
Jalolovning asosiy muvaffaqiyatlari 2019-yildan boshlandi. Tailandda o‘tgan Osiyo chempionatida oltin medalni qo‘lga kiritgan Bahodirga Termiz markazidan ikki xonali uy kaliti topshirildi.
O‘sha yili Rossiyaning Yekaterinburg shahrida bo‘lib o‘tgan Jahon chempionatida birinchi o‘rinni olgach, sovg‘alar qurshovida qoldi. Avvaliga boshqa chempionlar qatori unga Chevrolet Tracker avtomobili mukofot tariqasida berildi.
Tracker’dan hech qancha o‘tmay, musobaqaning eng yaxshi bokschisi sifatida e’tirof etilgan Bahodir Jalolovga Toshkent shahridan uy sovg‘a qilindi.
Surxondaryoda ham Bahodirning yutug‘i yuqori baholandi. Viloyat hokimligi bokschiga 200 million so‘m miqdorida pul mukofoti berdi.
Bokschi Tokio Olimpiadasiga yo‘llanma oldi. Olimpiada litsenziyasini qo‘lga kiritganlar qatorida Bahodirga ham 100 million so‘m miqdorida rag‘batlantirish berildi.
Olimpiya o‘yinlaridagi g‘oliblik orqali Jalolov Prezident tomonidan va’da qilingan 200 ming AQSh dollariga ega chiqdi. Chempion Toshkentga yetib kelgach, unga Chevrolet Tahoe avtomobili kaliti topshirildi. Shuningdek, oltin medal egalariga Toshkent shahridan 3 xonali 4 sotixli hovli berildi.
Surxondaryo hokimligi ham Bahodirning yutug‘ini befarq qoldirmadi va unga Skoda Kodiaq avtomobilini topshirdi.
Izoh (0)