AOKAda 19-avgust kuni Tokio—2020 Olimpiadasi yakunlariga bag‘ishlangan matbuot anjumani bo‘lib o‘tdi. Matbuot anjumanida MOQ bosh kotibi Oybek Qosimov boks musobaqalaridagi hakamlik haqida gapirdi.
Boks musobaqalari boshlanganidan keyin sportimiz muxlislari bokschilarimizni g‘alabalariga o‘rganib qolishgani uchun ulardan katta natijalar kutishdi. Bokschilarimiz birinchi bosqichdanoq mag‘lub bo‘lishlari hammamiz uchun kutilmagan holat bo‘ldi.Ma’lumot uchun aytaman, bu Olimpiadadagi boks musobaqalari AIBA tomonidan tashkil etilmadi. Balki XOQ tomonidan tuzilgan maxsus guruh tomonidan tashkil etildi. Ushbu guruhda Xalqaro gimnastika federatsiyasi rahbari Morinare Vatanabe, Xalqaro dzyudo federatsiyasi rahbari Marius Vizer, Xalqaro kurash federatsiyasi rahbari Nenad Lalovich uch xil yo‘nalish bo‘yicha musobaqalarni tashkil etishdi.
Bevosita musobaqalar qismiga janob Vatanabe mas’ul bo‘lganligi uchun biz zudlik bilan ulardan uchrashuv so‘radik va O‘zbekiston MOQ rahbari bilan uchrashuv tashkillashtirishga erishdik. Men ham ana shu uchrashuvda ishtirok etdim va suhbat davomida tarjimonlik vazifasini ham bajardim. Bevosita guvoh sifatida, bo‘lgan suhbat haqida aytishim mumkin.
Biz suhbat davomida ularga qattiq e’tiroz bildirib qo‘yishdan qo‘rqdik. Biz masalani ko‘ndalang qo‘yish kerakmi yoki yo‘q deya juda uzoq o‘yladik. Sababi ertaga o‘rtaga qo‘yayotgan masalamiz o‘zimizga qarshi ishlab qolmasin. Shu nuqtayi nazardan faqatgina mutaxassislar, murabbiylar shtabi bilan maslahatlashib, haqiqatan ham u yerda qanchalik darajada hakamlik taktik jihatdan bizga qarshi bo‘ldi degan masalani o‘rtaga qo‘ydik.
Ular bilan suhbat davomida biz hammamiz o‘ylayotgandek 100% nohaq hakamlik emas, balki qayerdadir noto‘g‘ri hisob kitoblar bo‘lganligini ta’kidlab o‘tishdi. Shu masalani biz e’tiroz sifatida Vatanabe janoblariga aytdik. Asos sifatida esa 33 millionlik o‘zbek xalqi O‘zbekiston bokschilaridan yuqori natijalarni va adolatni kutib qolishini ma’lum qildik. Vatanabe janoblari biz uchun alohida maxsus shaxsni belgilab berdi. Biz u shaxs bilan janglarni qayta tomosha qilib, qo‘yilgan natijalarni tahlil qildik.
U yerdagi aniq raqamlarni aytishdan yiroqman, lekin bokschimiz Mirazizbek Mirzaxalilov to‘liq ustunlik qilib tursa ham, hakamlar irlandiyalik bokschini g‘olib deb topishdi. O‘shanda amerikalik hakam tomonidan tushunarsiz baho qo‘yilganligi uchun, uning harakati shubhali deb topildi. Ular bu holatni quyidagicha tushuntirib berdi: har bir jangda hakamlardan tashqari ularning ustidan yana ikkita nazoratchi qo‘yilgan. Yaqqol ustunlik bo‘lib turgan joyda shubhali baho bergan hakamning harakati alohida o‘rganilib, kerak bo‘lsa, zudlik bilan shu joyning o‘zida hakamlikdan chetlashtirilishi to‘g‘risida aytib o‘tilgan edi.
Natijada boks musobaqalari davomida, biz masalani ko‘targandan so‘ng boks musobaqalaridan ikkita hakam chetlatilganligini bizga aytishdi. Afsuski, ularning qoidasi bo‘yicha, xuddi futboldagidek jazo faqatgina hakamga bo‘lib, natija esa o‘zgarishsiz qolar ekan.
Oybek Qosimov, MOQ bosh kotibi
Ma’lumot uchun, -57 kg vazn toifasida O‘zbekiston sharafini himoya qilgan Mirazizbek Mirzaxalilov 1/8 finalda irlandiyalik Kyort Uokerga qarshi jangda ustunlikka ega bo‘lganiga qaramay, hakamlar g‘alabani Uokerga bergandi.
Izoh (0)