Ashraf G‘anining ukasi “Tolibon” tarafiga o‘tdi

Afg‘onistondan qochib ketgan prezident Ashraf G‘anining kichik ukasi Hashmat G‘ani “Tolibon” harakatiga qo‘shildi. Bu haqda toliblarning o‘zi rasmiy bayonot bergan, deb yozmoqda “Kommersant”.

“Afg‘oniston sobiq prezidenti Ashraf G‘anining ukasi Hashmat G‘ani Halil Rahmon Haqqoniy oldida Islom amirligiga sadoqat bilan xizmatda bo‘lish haqida qasamyod qildi”,— deyiladi “Tolibon” bayonotida (“RIA Novosti”).

Halil Al-Rahmon Haqqoniy – “Haqqoniy tarmog‘i” terrorchilik guruhining yuqori lavozimdagi a’zosi hisoblanadi. Ushbu guruh toliblar bilan hamkorlik qiladi. Xabarga ko‘ra, 21-avgustda Kobulda Afg‘oniston sobiq bosh vaziri, mamlakatdagi Islom partiyasi yetakchisi Gulbiddin Hikmatiyor bilan uchrashuv o‘tkazilgan.

Iyul oyida AQSh harbiylarining Afg‘onistonni tark eta boshlashiga hamohang ravishda mamlakat hukumati qo‘shinlari hamda “Tolibon” vakillari o‘rtasidagi to‘qnashuvlar keskinlashgan. “Tolibon” 15-avgustda poytaxt Kobulga kirib kelgan va shu kuni oqshom vaqtida mamlakatni o‘z nazorati ostiga olganini e’lon qilgan. Prezident Ashraf G‘ani iste’foga chiqqanini bildirib, mamlakatdan chiqib ketgan. Dastlab Ashraf G‘anining Tojikiston, O‘zbekiston yoki Ummonda bo‘lishi mumkinligi taxmin qilingan, ammo bu ma’lumotlar rasman tasdig‘ini topmagan. Keyinchalik Ashraf G‘anining BAAda ekanligi ma’lum qilingan, uning o‘zi ham Abu-Dabidan videomurojaat yo‘llab, nima uchun Afg‘onistondan ketgani va yaqin orada yana ortga qaytishi mumkinligini bildirgan.