AQShning Kobuldagi elchixonasi xodimlari Davlat departamentini Amerika qo‘shinlari olib chiqilgach, ko‘p o‘tmay Afg‘onistonda hokimiyat qulashi mumkinligi haqida ogohlantirgan. Bu haqda The Wall Street Journal o‘z manbalariga tayanib xabar berdi.
Ularga ko‘ra, 13-iyul kuni Amerika elchixonasining 23 nafar xodimi AQSh davlat kotibi Entoni Blinkenga va Davlat departamenti Siyosiy rejalashtirish byurosi rahbari Salmon Ahmadga telegramma yuborib, “Tolibon” harakati jangarilarining tezkor va muqarrar hujumi haqida ogohlantirgan.
The Wall Street Journal manbalari qayd etishicha, Amerika diplomatlari o‘sha vaqtda Afg‘oniston hukumat kuchlari radikallarga qarshilik ko‘rsata olmasligi mumkin, degan fikrda bo‘lgan.
Shu sababli elchixona xodimlari AQSh qo‘shinlarini olib ketish yakunlanganidan keyin (yakunlash 31-avgustga belgilangan edi) tez orada Kobuldagi hokimiyat radikallar qo‘liga o‘tishi mumkinligi yuzasidan xavotir bildirgan. Gazeta manbalariga ko‘ra, Amerika tashqi siyosiy idorasi rahbari bu hujjat bilan tanishib chiqqan.
Elchixona xodimlari Vashingtondagi hukumatga zudlik bilan AQSh Qurolli kuchlari bilan hamkorlik qilgan afg‘onistonliklar orasidan maxsus immigratsiya vizalariga ehtimoliy da’vogarlar haqida ma’lumot to‘plash va ularni ro‘yxatga olishni boshlashni maslahat bergan. Bundan tashqari, 1-avgustdan kechiktirmasdan, mamlakatdan evakuatsiya reyslarini ishga tushirish tavsiya etilgan edi.
Avvalroq esa AQSh prezidenti Jo Bayden ABC telekompaniyasiga bergan intervyusida Amerika razvedkasi hisobotlarida “Tolibon”ning Afg‘onistonda qachon hokimiyat tepasiga kelishi borasida aniq bitta fikr bo‘lmaganini bildirgandi. “Ular bu yil oxiriga yaqin sodir bo‘lishi ehtimoli eng yuqori ekanini aytgandi”, — dedi Bayden.
Aprel oyida Bayden Amerika qo‘shinlarining barchasini Nyu-York va Vashingtonda 2001-yil 11-sentabrda yuz bergan teraktlarga 20 yil to‘ladigan kungacha olib chiqib ketishni va’da qilgan edi. Keyinroq muddat 31-avgustga surildi. Iyulga kelib Afg‘onistondan AQSh harbiy kontingentining 90 foizi chiqib ketdi. Shundan keyin “Tolibon” hukumat harbiy kuchlariga qarshi hujumlarni kuchaytirdi. 15-avgust kuni jangarilar Kobuldagi prezident saroyiga kirdi va Afg‘onistonni to‘liq egallab olganini e’lon qildi. Prezident Ashraf G‘ani mamlakatdan qochib ketdi.
Izoh (0)