Ашраф Ғанининг укаси «Толибон» тарафига ўтди

Афғонистондан қочиб кетган президент Ашраф Ғанининг кичик укаси Ҳашмат Ғани «Толибон» ҳаракатига қўшилди. Бу ҳақда толибларнинг ўзи расмий баёнот берган, деб ёзмоқда «Коммерсантъ».

«Афғонистон собиқ президенти Ашраф Ғанининг укаси Ҳашмат Ғани Ҳалил Раҳмон Ҳаққоний олдида Ислом амирлигига садоқат билан хизматда бўлиш ҳақида қасамёд қилди»,— дейилади «Толибон» баёнотида («РИА Новости»).

Ҳалил Ал-Раҳмон Ҳаққоний – «Ҳаққоний тармоғи» террорчилик гуруҳининг юқори лавозимдаги аъзоси ҳисобланади. Ушбу гуруҳ толиблар билан ҳамкорлик қилади. Хабарга кўра, 21 августда Кобулда Афғонистон собиқ бош вазири, мамлакатдаги Ислом партияси етакчиси Гулбиддин Ҳикматиёр билан учрашув ўтказилган.

Июль ойида АҚШ ҳарбийларининг Афғонистонни тарк эта бошлашига ҳамоҳанг равишда мамлакат ҳукумати қўшинлари ҳамда «Толибон» вакиллари ўртасидаги тўқнашувлар кескинлашган. «Толибон» 15 августда пойтахт Кобулга кириб келган ва шу куни оқшом вақтида мамлакатни ўз назорати остига олганини эълон қилган. Президент Ашраф Ғани истеъфога чиққанини билдириб, мамлакатдан чиқиб кетган. Дастлаб Ашраф Ғанининг Тожикистон, Ўзбекистон ёки Уммонда бўлиши мумкинлиги тахмин қилинган, аммо бу маълумотлар расман тасдиғини топмаган. Кейинчалик Ашраф Ғанининг БААда эканлиги маълум қилинган, унинг ўзи ҳам Абу-Дабидан видеомурожаат йўллаб, нима учун Афғонистондан кетгани ва яқин орада яна ортга қайтиши мумкинлигини билдирган.