Vashingtonda Kongress kutubxonasi binosi oldiga kelib to‘xtagan yuk mashinasi haydovchisi mashinada bomba borligini aytdi. Bu haqda Associated Press xabar berdi.
Politsiya yaqin atrofdagi bir qancha binolardan odamlarni evakuatsiya qilgan va erkak bilan murosa qilishni boshlagan. Politsiya uning qo‘lida portlatkichga o‘xshash qurilma borligini payqagan.
CNBC xabar berishicha, gumondor — Shimoliy Karolinada yashovchi 49 yoshli Floyd Rey Rouzberri. Erkak o‘z mashinasidan Facebook’da jonli efir o‘tkazib, AQSh hukumatini tanqid qilgan va portlashlar bilan tahdid qilgan. Bir necha soat o‘tgach, ijtimoiy tarmoq ma’muriyati videoni o‘chirib tashladi.
Xabarga ko‘ra, bu odam jonli efirda AQSh prezidenti Jo Bayden bilan gaplashishga ruxsat berishni talab qilgan va boshqa joyga yana to‘rtta bomba qo‘yganini aytgan. Erkakning so‘zlariga ko‘ra, agar xavfsizlik kuchlari uni o‘ldirsa, ular ikki yarimta blokni portlatib yuborishi mumkin.
Bir necha soatlik muzokaralardan so‘ng erkak rasmiylarga taslim bo‘ldi. Kapitoliy politsiyasi boshlig‘i Tom Menjer gumonlanuvchining o‘zi mashinadan chiqib, huquq-tartibot organlariga taslim bo‘lganini tasdiqladi.
Oq uy vakilining aytishicha, prezident Jo Baydenga Vashingtondagi bomba xavfi haqida xabar berilgan. Hukumat Kongress kutubxonasining ikkita binosini, eng yaqin ofis binosini va Oliy sudni evakuatsiya qilgan.
Shuningdek, 19-avgust kuni Nyu-Yorkdagi Tayms-skverda noma’lum shaxs shubhali narsa tashlab ketgani tufayli politsiya maydonning bir qismidan odamlarni evakuatsiya qilgandi.
NBC yozishicha, velosipedda ketayotgan kishi zinapoyada o‘tirgan odamlar yoniga metall qutiga o‘xshagan buyumni tashlagan, natijada odamlar qochib ketgan.
Nyu-York shahar politsiyasi, “politsiya tekshiruvi munosabati bilan”, yettinchi avenyu bo‘ylab 45-chi ko‘chadan 48-chi ko‘chaga qadar Tayms-skver ko‘chalarini yopib qo‘ygan. Keyinchalik politsiya bo‘limi maydondagi shubhali narsa tekshirilgani, u hech qanday xavf tug‘dirmasligini ma’lum qilgan. Politsiya qurshovi tarqatib yuborilgan.
Izoh (0)