“‘Tolibon’ Kobuldagi evakuatsiyaga to‘sqinlik qilishga urinsa, AQSh unga javob qaytaradi” — Bayden

“Tolibon” jangarilari Kobul aeroportidagi evakuatsiya jarayoniga aralashishga uringan taqdirda, AQSh ularga tezda javob qaytaradi. AQSh bu haqda “Tolibon”ni ogohlantirgan, deya ma’lum qildi mamlakat prezidenti Jo Bayden.

“Biz ‘Tolibon’ga bizning kuchlarimizga qilingan har qanday hujum yoki aeroportdagi evakuatsiya jarayoniga to‘sqinlik qiluvchi vaziyatga tez va kuchli javob berilishini aniq qilib bildirdik. Shuningdek, biz aeroport yoki uning atrofidagi har qanday potensial terrorchilik tahdidini, jumladan, qamoqdan ozod qilingan, IShIDga aloqasi bor shaxslarni diqqat bilan kuzatib bormoqdamiz”, — dedi Bayden. “Shu bilan birga, IShID ‘Tolibon’ning ashaddiy dushmani hisoblanadi. Biz ittifoqchilarimiz va sheriklarimiz bilan yaqindan birlashishga e’tibor qaratmoqdamiz”.

“Men Buyuk Britaniya bosh vaziri, Germaniya Federativ Respublikasi kansleri va Fransiya prezidenti bilan gaplashdim. Hammamiz kelasi hafta G7 sammitini chaqirishga kelishib oldik. Biz birgalikda Afg‘onistonga bo‘lgan yondashuvimizni muvofiqlashtira olamiz”, — dedi AQSh prezidenti.

Baydenning so‘zlariga ko‘ra, gumanitar yordam, xususan, qochoqlar uchun oziq-ovqat va dori-darmonlar yetkazib berish zarurligi muhokama qilingan. “Biz aholiga, ayniqsa, ayollar va qizlarga munosabati masalasida ‘Tolibon’ga xalqaro bosim o‘tkazyapmiz. O‘tgan hafta yurakni ezadigan davr bo‘ldi. Biz vahima ichida yurgan odamlarning tasviri tushirilgan kadrlarni ko‘rdik” — dedi AQSh prezidenti.

Baydenning ta’kidlashicha, AQShning Kobul aeroportidagi hozirgi harbiy amaliyoti nihoyatda qiyin va xavfli.

“Tolibon” Kobul aeroportidagi evakuatsiya ishlariga aralashmaslikka va’da bergan. Ammo amerikaliklar va ularning ittifoqchilari bilan hamkorlik qilgan afg‘onistonliklar “Tolibon” ularning ketishiga to‘sqinlik qilishidan qo‘rqmoqda.

The New York Times xabariga ko‘ra, “Tolibon” so‘roq qilish va jazolash uchun AQSh harbiylari bilan hamkorlik qilgan afg‘onlarni qidira boshlagan. NYT ta’kidlashicha, “Tolibon” ro‘yxatdagi odamlarni jumladan Kobul aeroporti yaqinidan ham qidirmoqda, aeroport hozir mamlakatni tark etish mumkin bo‘lgan yagona joy.