Тошкент вилоятнинг Зангиота туманида экстремистик фаолият билан шуғулланиб келаётган яна бир гуруҳ ушланди. Бу ҳақда вилоят ИИББ матбуот хизмати хабар берди.
Аввалроқ вилоят ҳудудида жиноятчиликни жиловлаш ва фуқаролар хавфсизлигини таъминлашга қаратилган «Хавфсиз ҳудуд» кенг қамровли, тезкор профилактик тадбирларининг бирида Зангиота туманида бир гуруҳ экстремистик оқим аъзолари ушланган ҳақида хабар берилган ва ҳолат юзасидан қўшимча суриштирув ишлари олиб борилаётгани маълум қилинган.
Аниқланган маълумотлар асосида ушбу туманида вилоят прокуратураси, ДХХ ва ИИББ ходимлари иштирокида навбатдаги «Хавфсиз ҳудуд» тезкор тадбири ташкил этилган ва яширин экстремистик фаолият билан шуғулланаётган бир гуруҳ шахслар ушланган.
Қайд этилишича, айни пайтда ҳолат юзасидан тергов ҳаракатлари давом эттирилмоқда. Шунингдек, ўтказилган тадбирлар давомида қидирув, ёнида тиғли жисм олиб юриш, белгиланган карантин ва паспорт-виза қоидаларини бузиш, жамоат жойида спиртли ичимлик истеъмол қилиш, безорилик ва ноқонуний ов қуроли сақлаш каби бир нечта ҳолатлар аниқланиб белгиланган тартибда чоралар кўрилмоқда.
Бундан аввал «Хавфсиз ҳудуд» кенг қамровли профилактик тадбирлари доирасида Тошкент вилоятининг Чиноз туманида «Жиҳодчилар» экстремистик оқими аъзоларининг 10 нафари қўлга олингани ҳақида хабар берилган эди.
Изоҳ (0)