Тошкент вилоятининг Оққўрғон туманидаги боғчада 12 август куни 25 нафар бола заҳарланиб, шифохонага ётқизилганди. 13 август куни тиббиёт муассасаларига ётқизилган тарбияланувчилар сони 30 нафарга етганди. Мактабгача таълим вазирлиги ушбу болаларнинг аҳволи ҳақидаги кунлик маълумотини эълон қилди.
19 август 16:00 соат ҳолатига кўра, тиббиёт муассасаларида жами 9 тарбияланувчи даволанмоқда, жумладан, 3 нафарининг аҳволи — ўрта оғир, 5 нафар беморнинг аҳволи ўртача баҳоланиб, динамикада соғаймоқда, 1 нафар боланинг аҳволи эса қониқарли.
Таъкидланишича, Мактабгача таълим вазирлиги томонидан тарбияланувчиларнинг саломатлиги ва ўтказилаётган суруштирув ишлари натижалари бўйича маълумот берилади.
«Бугунги кунга келиб 21 нафар тарбияланувчига уйига рухсат берилган», — дейилади хабарда.
Эслатиб ўтамиз, ушбу боғча тарбияланувчилари заҳарлангани ҳолати юзасидан Жиноят кодексининг 257-1-моддаси (санитарияга оид қонунчиликни ёки эпидемияга қарши кураш қоидаларини бузиш) билан жиноят иши қўзғатилган. Тергов ҳаракатлари олиб борилмоқда.
Мавзуга доир: Олмалиқда 49 киши музқаймоқдан заҳарланди
Изоҳ (0)