Президент Шавкат Мирзиёевга ишбилармонлар томонидан йўлланган мурожаатларнинг кўпида бизнесни молиялаштириш манбаларини янада кўпайтириш мақсадида нобанк кредит ташкилотларини очиш ва юритишга бўлган мавжуд талабларни камайтириш ва енгиллаштириш сўралган. Бу ҳақда давлат раҳбари сўз юритди, дея хабар бермоқда «Дарё» мухбири.
«Бу масала Андижондан Алмаз финанс корхонаси раҳбари Олимжон Охунов ва Жиззахдан Diamond-N корхонаси раҳбари Шерзод Соатовнинг мурожаатларида ҳам кўтарилган. Бу таклифлар бизга жуда маъқул. Шунинг учун 2021 йил 1 октябрдан микро-молия ташкилотларини лицензиялаш тартиби тўлиқ бекор қилинади. Энди улар фаолиятини бошлаши учун фақатгина Марказий банк реестрига киришлари кифоя.
Шунингдек, бундан буён уларга касса хоналари ташкил этиш, ҳудудларда филиаллар очиш учун Марказий банкнинг розилигини олиш шарт бўлмайди. Улар томонидан тадбиркорларга бериладиган микрокредит (300 миллион сўм) ва микролизинг (600 миллион сўм) учун амалдаги чекловлар ҳам олиб ташланади. Шу билан бирга, микромолия ташкилотларига бошқа ташкилотлардан маблағлар жалб қилиш, облигациялар чиқариш ҳуқуқлари ҳам берилади.
Мазкур ташкилотлар худди банклар каби тўловларни қабул қилиш ваколатига ҳам эга бўладилар. Умуман, ушбу янги имкониятлар ҳисобидан ҳам, кредит бозорида тадбиркорларимиз учун йилига қўшимча 10 триллион сўм маблағ шаклланади», — дейди Мирзиёев.
Аввалроқ Шавкат Мирзиёев солиқ идоралари қўллаётган айрим жарималар сонидан хавотирда эканлиги, инфляция даражасини келгуси икки йилда 5 фоизга тушириш режа қилингани, Ўзбекистонда тадбиркорларга кредитни миллий валюта — сўмда бериш тизими йўлга қўйилишини маълум қилганди.
Изоҳ (0)