O‘zbekistonning Litvadagi elchisi Qadamboy Sultonov 17-avgust kuni Litva prezidenti Gitanas Nausedaga ishonch yorliqlarini topshirdi, deb xabar beradi Tashqi ishlar vazirligi matbuot xizmati.
Suhbat chog‘ida Litva prezidenti Toshkent va Vilnyus o‘rtasidagi siyosiy muloqotni va ikki tomonlama savdo-iqtisodiy hamkorlikning rivojlanish suratlarini ijobiy baholagan. Yevropa Ittifoqiga a’zo davlatlar orasida Litva 2020-yil yakuniga ko‘ra, O‘zbekistonning Germaniyadan keyingi ikkinchi yirik savdo sherigiga aylangani alohida ta’kidlangan.
O‘zbekiston elchisi so‘nggi yillarda Prezident Shavkat Mirziyoyev rahbarligida O‘zbekistonda erishilgan keng ko‘lamli o‘zgarishlar natijalari, O‘zbekiston—Litva hamkorligining istiqbolli yo‘nalishlari va mintaqaviy rivojlanish masalalari haqida batafsil ma’lumot bergan.
“Litva prezidenti O‘zbekistonda olib borilayotgan islohotlar Vilnyusda yuqori baholanishi, islohotlar natijalari esa Yevropa Ittifoqining barcha davlatlari tomonidan olqishlanishini ma’lum qildi”, — deyiladi xabarda.
Kengaytirilgan sheriklik va hamkorlik to‘g‘risidagi bitimning imzolanishi O‘zbekiston va Yevropa Ittifoqi o‘rtasidagi keng qamrovli sheriklikni sezilarli darajada faollashtirishi qayd etilgan.
Eslatib o‘tamiz, Qadamboy Sultonov 2019-yilning oktabr oyidan buyon O‘zbekistonning Latviyadagi elchisi hisoblanadi, shu bilan birga, u bir vaqtning o‘zida Finlyandiyadagi elchi hamdir.
Izoh (0)