Ўзбекистоннинг Литвадаги элчиси Қадамбой Султонов 17 август куни Литва президенти Гитанас Науседага ишонч ёрлиқларини топширди, деб хабар беради Ташқи ишлар вазирлиги матбуот хизмати.
Суҳбат чоғида Литва президенти Тошкент ва Вильнюс ўртасидаги сиёсий мулоқотни ва икки томонлама савдо-иқтисодий ҳамкорликнинг ривожланиш суратларини ижобий баҳолаган. Европа Иттифоқига аъзо давлатлар орасида Литва 2020 йил якунига кўра, Ўзбекистоннинг Германиядан кейинги иккинчи йирик савдо шеригига айлангани алоҳида таъкидланган.
Ўзбекистон элчиси сўнгги йилларда Президент Шавкат Мирзиёев раҳбарлигида Ўзбекистонда эришилган кенг кўламли ўзгаришлар натижалари, Ўзбекистон—Литва ҳамкорлигининг истиқболли йўналишлари ва минтақавий ривожланиш масалалари ҳақида батафсил маълумот берган.
«Литва президенти Ўзбекистонда олиб борилаётган ислоҳотлар Вильнюсда юқори баҳоланиши, ислоҳотлар натижалари эса Европа Иттифоқининг барча давлатлари томонидан олқишланишини маълум қилди», — дейилади хабарда.
Кенгайтирилган шериклик ва ҳамкорлик тўғрисидаги битимнинг имзоланиши Ўзбекистон ва Европа Иттифоқи ўртасидаги кенг қамровли шерикликни сезиларли даражада фаоллаштириши қайд этилган.
Эслатиб ўтамиз, Қадамбой Султонов 2019 йилнинг октябрь ойидан буён Ўзбекистоннинг Латвиядаги элчиси ҳисобланади, шу билан бирга, у бир вақтнинг ўзида Финляндиядаги элчи ҳамдир.
Изоҳ (0)