Prezidentlikka nomzod Bahrom Abduhalimov: “Tonirovka” uchun jarima adolatsiz o‘rnatilgan

“Adolat” sotsial demokratik partiyasidan O‘zbekiston prezidentligiga nomzod Bahrom Abduhalimov “tonirovka” masalasida o‘z fikrini bildirib o‘tdi.

Uning ta’kidlashicha, aholining oynalarni qoraytirishga ruxsat yo‘qligi va jarima miqdorining yuqoriligiga bildirayotgan e’tirozlari asosli va o‘rinlidir.

“Avval ham partiyamiz tomonidan ‘tonirovka’ masalasi ko‘tarilgani ko‘plab aholi vakillari tomonidan iliq kutib olindi. Bu insonlarning ko‘nglidagi gap bo‘lib chiqqani haqida e’tiroflar qabul qildik. Ijtimoiy tarmoqlarda o‘tkazgan so‘rovnomalarimiz ham ko‘pchilik bepul ‘tonirovka’ tarafdori ekanini ko‘rsatdi.

Ushbu mavzu nechog‘lik dolzarbligi kundek ravshan ekanligiga qaramay hamon masala yechimini topmagan savol ostida turibdi. Vaholanki, haydovchilarning oynalarni qoraytirishga ruxsat yo‘qligi va jarima miqdorining yuqoriligiga bildirayotgan e’tirozlari asosli va o‘rinlidir.

Yurtimizga serquyosh ta’rifi berilishi bejiz emas. Jazirama yoz hamda kuz va bahor faslida quyosh mo‘lligi ob-havo bilan bog‘liq noqulayliklarni tug‘diradi. Oftob tig‘ida qolish, quyoshning ultrabinafsha nurlarini me’yordan ortiq qabul qilish sog‘liq uchun zararligini tibbiyotchilar tasdiqlaydi.

Qayd etilishicha, me’yoridan ortiq oftobning inson organizmiga salbiy ta’siri bir qancha ziyonlar qatorida mehnat unumdorligini ham tushirib yuboradi. Buning oldini olish uchun quyoshdan himoyalanish vositalaridan foydalanishga katta ahamiyat berish taqozo etiladi”, — deydi nomzod.

“Ma’muriy javobgarlik to‘g‘risidagi kodeksda belgilangan ayrim turdagi jarimalarning miqdorlari va ularni bir-biri bilan ijtimoiy xavflilik nuqtayi nazaridan solishtirganda bu borada jarimalarning adolatsiz o‘rnatilganini ko‘rishimiz mumkin.

Ma’muriy javobgarlik to‘g‘risidagi kodeksning 2-moddasiga ko‘ra ma’muriy javobgarlik to‘g‘risidagi qonunchilik inson va jamiyat farovonligi yo‘lida boshqa bir qator ustuvor vazifalar bilan birga ijtimoiy adolat va qonuniylikni ta’minlashni o‘z oldiga vazifa qilib qo‘yadi.

Shu o‘rinda savol tug‘iladi. Avtomobil oynalarini qoraytirish orqali oftob nuridan himoyalanish kundalik zarurat ekan, nega bu harakat katta miqdorda jarima bilan jazolanmoqda?

Shu kecha-kunduzda ‘tonirovka’ uchun jarima 6 milliondan ortiq summani tashkil qilmoqda. Bu huquqbuzarlik boshqa ijtimoiy xavfi yuqori bo‘lgan huquqbuzarliklardan kam.

Masalan, tezlikni 40 kilometrdan oshirganlik uchun 2,2 million so‘m, ya’ni uch baravar kam jarima belgilangan. Axir tezlikni oshirish, ya’ni yo‘lda 150—200 kilometr/soat harakatlanishning oqibati og‘ir, hatto odamlar o‘limiga olib kelishi mumkin va olib kelmoqda, biz buni siz bilan kunda ijtimoiy tarmoqlarda kuzatib boryapmiz.

‘Tonirovka’ esa deyarli xavf tug‘dirmaydi. Vaholanki, agar pulini to‘lasangiz, umuman bu huquqbuzarlik qonuniy bo‘ladi qoladi.

Yana taqriban oladigan bo‘lsak, qizil chiroqqa o‘tish jarimasi 4,9 million so‘m, yo‘l harakati qoidasini buzib, yengil tan jarohatini yetkazgan shaxsga 1,7 million so‘mgacha jarima solinadi. Ko‘rib turganingizdek, svetoforga qarab harakatlanmaslik yoxud yo‘lovchiga daxl ko‘rsatish ‘tonirovka’dan ko‘ra ahamiyati va mohiyati past holatdek baholanmoqda. Zarurat hisoblanmish oyna qoraytirishga esa jarima adolatsiz qo‘llanilmoqda. Haydovchi va yo‘lovchining talab va ehtiyoji hisobga olinmayapti.

Kuniga barchamiz ijtimoiy tarmoqlarda tezlikni oshirish yoki svetoforning “qizil” chirog‘iga o‘tib ketish oqibatida ayanchli holatlar yuz berayotganligini ko‘rib turibmiz. Ruxsatsiz ‘tonirovka’ oqibatida esa biron-bir shaxsga ziyon yetganini tasdiqlovchi ma’lumot mavjud emas. Bunday holat bo‘lmasin ham.

Tegishli qaror bilan ‘tonirovka’ ruxsatnomasini olish uchun katta miqdorda bir tashkilotning ‘cho‘ntagiga’ tushadigan pulni to‘lamaganlik uchun bu darajada katta jarimalarning o‘rnatilishi adolatsizlik. Axir inson sog‘lig‘i va hayoti har qanday tashkilotning iqtisodiy manfaatidan ustun turadi-ku!?

Shunday ekan, Ma’muriy javobgarlik to‘g‘risidagi kodeksda qayd etilgan jarimalarni qayta ko‘rib chiqish fursati yetdi. Zero, adolatga zid normalar o‘z kuchini yo‘qotib, o‘rnini xalqchil me’yorlarga bo‘shatib berishi shart. Biz ijtimoiy adolat tarafdorimiz”, — deydi Bahrom Abduhalimov.

Bundan avval Bahrom Abduhalimov majburiy emlash nazarda tutilgan qonunga e’tiroz bildirgani hamda obodonlashtirish xodimlarini uyida ishlatgani aytilgan prokurorni tanqid qilgani haqida xabar berilgandi.