Президентликка номзод Баҳром Абдуҳалимов: «Тонировка» учун жарима адолатсиз ўрнатилган

«Адолат» социал демократик партиясидан Ўзбекистон президентлигига номзод Баҳром Абдуҳалимов «тонировка» масаласида ўз фикрини билдириб ўтди.

Унинг таъкидлашича, аҳолининг ойналарни қорайтиришга рухсат йўқлиги ва жарима миқдорининг юқорилигига билдираётган эътирозлари асосли ва ўринлидир.

«Аввал ҳам партиямиз томонидан ‘тонировка’ масаласи кўтарилгани кўплаб аҳоли вакиллари томонидан илиқ кутиб олинди. Бу инсонларнинг кўнглидаги гап бўлиб чиққани ҳақида эътирофлар қабул қилдик. Ижтимоий тармоқларда ўтказган сўровномаларимиз ҳам кўпчилик бепул ‘тонировка’ тарафдори эканини кўрсатди.

Ушбу мавзу нечоғлик долзарблиги кундек равшан эканлигига қарамай ҳамон масала ечимини топмаган савол остида турибди. Ваҳоланки, ҳайдовчиларнинг ойналарни қорайтиришга рухсат йўқлиги ва жарима миқдорининг юқорилигига билдираётган эътирозлари асосли ва ўринлидир.

Юртимизга серқуёш таърифи берилиши бежиз эмас. Жазирама ёз ҳамда куз ва баҳор фаслида қуёш мўллиги об-ҳаво билан боғлиқ ноқулайликларни туғдиради. Офтоб тиғида қолиш, қуёшнинг ультрабинафша нурларини меъёрдан ортиқ қабул қилиш соғлиқ учун зарарлигини тиббиётчилар тасдиқлайди.

Қайд этилишича, меъёридан ортиқ офтобнинг инсон организмига салбий таъсири бир қанча зиёнлар қаторида меҳнат унумдорлигини ҳам тушириб юборади. Бунинг олдини олиш учун қуёшдан ҳимояланиш воситаларидан фойдаланишга катта аҳамият бериш тақозо этилади», — дейди номзод.

«Маъмурий жавобгарлик тўғрисидаги кодексда белгиланган айрим турдаги жарималарнинг миқдорлари ва уларни бир-бири билан ижтимоий хавфлилик нуқтаи назаридан солиштирганда бу борада жарималарнинг адолатсиз ўрнатилганини кўришимиз мумкин.

Маъмурий жавобгарлик тўғрисидаги кодекснинг 2-моддасига кўра маъмурий жавобгарлик тўғрисидаги қонунчилик инсон ва жамият фаровонлиги йўлида бошқа бир қатор устувор вазифалар билан бирга ижтимоий адолат ва қонунийликни таъминлашни ўз олдига вазифа қилиб қўяди.

Шу ўринда савол туғилади. Автомобиль ойналарини қорайтириш орқали офтоб нуридан ҳимояланиш кундалик зарурат экан, нега бу ҳаракат катта миқдорда жарима билан жазоланмоқда?

Шу кеча-кундузда ‘тонировка’ учун жарима 6 миллиондан ортиқ суммани ташкил қилмоқда. Бу ҳуқуқбузарлик бошқа ижтимоий хавфи юқори бўлган ҳуқуқбузарликлардан кам.

Масалан, тезликни 40 километрдан оширганлик учун 2,2 миллион сўм, яъни уч баравар кам жарима белгиланган. Ахир тезликни ошириш, яъни йўлда 150—200 километр/соат ҳаракатланишнинг оқибати оғир, ҳатто одамлар ўлимига олиб келиши мумкин ва олиб келмоқда, биз буни сиз билан кунда ижтимоий тармоқларда кузатиб боряпмиз.

‘Тонировка’ эса деярли хавф туғдирмайди. Ваҳоланки, агар пулини тўласангиз, умуман бу ҳуқуқбузарлик қонуний бўлади қолади.

Яна тақрибан оладиган бўлсак, қизил чироққа ўтиш жаримаси 4,9 миллион сўм, йўл ҳаракати қоидасини бузиб, енгил тан жароҳатини етказган шахсга 1,7 миллион сўмгача жарима солинади. Кўриб турганингиздек, светофорга қараб ҳаракатланмаслик ёхуд йўловчига дахл кўрсатиш ‘тонировкаъдан кўра аҳамияти ва моҳияти паст ҳолатдек баҳоланмоқда. Зарурат ҳисобланмиш ойна қорайтиришга эса жарима адолатсиз қўлланилмоқда. Ҳайдовчи ва йўловчининг талаб ва эҳтиёжи ҳисобга олинмаяпти.

Кунига барчамиз ижтимоий тармоқларда тезликни ошириш ёки светофорнинг «қизил» чироғига ўтиб кетиш оқибатида аянчли ҳолатлар юз бераётганлигини кўриб турибмиз. Рухсатсиз ‘тонировка’ оқибатида эса бирон-бир шахсга зиён етганини тасдиқловчи маълумот мавжуд эмас. Бундай ҳолат бўлмасин ҳам.

Тегишли қарор билан ‘тонировка’ рухсатномасини олиш учун катта миқдорда бир ташкилотнинг ‘чўнтагига’ тушадиган пулни тўламаганлик учун бу даражада катта жарималарнинг ўрнатилиши адолатсизлик. Ахир инсон соғлиғи ва ҳаёти ҳар қандай ташкилотнинг иқтисодий манфаатидан устун туради-ку!?

Шундай экан, Маъмурий жавобгарлик тўғрисидаги кодексда қайд этилган жарималарни қайта кўриб чиқиш фурсати етди. Зеро, адолатга зид нормалар ўз кучини йўқотиб, ўрнини халқчил меъёрларга бўшатиб бериши шарт. Биз ижтимоий адолат тарафдоримиз», — дейди Баҳром Абдуҳалимов.

Бундан аввал Баҳром Абдуҳалимов мажбурий эмлаш назарда тутилган қонунга эътироз билдиргани ҳамда ободонлаштириш ходимларини уйида ишлатгани айтилган прокурорни танқид қилгани ҳақида хабар берилганди.