O‘zbekiston 2021-yilning birinchi yarmida qancha tabiiy gaz import qilgani ma’lum bo‘ldi

Prezident Shavkat Mirziyoyev mutasaddi tashkilot rahbarlariga yil yakunigacha 850 ming tonna suyultirilgan gaz ishlab chiqarib, aholi ehtiyojlarini to‘liq qondirish topshirig‘ini bergan. Bu haqda davlat rahbari matbuot kotibi Sherzod Asadov 16-avgust kuni o‘tkazilgan brifingda so‘z yuritdi, deb xabar bermoqda “Daryo” muxbiri.

“Hurmatli Prezidentimiz 9-avgust kuni neft va gaz ishlab chiqarishni kengaytirish hamda barqaror yetkazib berish masalalari bo‘yicha yig‘ilish o‘tkazdi. Unda bu tarmoqdagi ko‘rsatkichlar tanqidiy muhokama qilindi. Xususan, birinchi yarim yillikda tabiiy gaz va suyultirilgan gaz rejaga nisbatan kam ishlab chiqarilgan. Oqibatda 917 million kub metr tabiiy gaz import qilingan.

Shu sababli davlatimiz rahbari mutasaddilarga har bir ko‘rsatkichni, berilayotgan mablag‘lar natijadorligini chuqur tahlil qilish vazifasini qo‘ygan edilar. Yig‘ilishda shu tahlillar asosida navbatdagi chora-tadbirlar muhokama qilindi.

Prezidentimiz ikkinchi yarim yillikda 32 milliard kub metr tabiiy gaz balansini ta’minlash, ayniqsa, kuz-qish mavsumida tizimni barqaror ishlatish bo‘yicha topshiriqlar berdi. Yil yakunigacha 850 ming tonna suyultirilgan gaz ishlab chiqarib, aholi ehtiyojlarini to‘liq qondirish zarurligi ta’kidlandi”, — dedi Asadov.