O‘zbekiston musulmonlari idorasi raisi, muftiy Usmonxon Alimov 71 yoshida vafot etgani haqida xabar berilgan edi. Janoza namozi va ta’ziya marosimlari 16-avgust kuni Samarqand viloyati Ishtixon tumani Orlot qishlog‘i “Eshoni Temirxon To‘ra” (avvalgi “Orlot” masjidi) jome masjidida bo‘lib o‘tdi. “Daryo” muxbiri Usmonxon Alimov bilan vidolashuv marosimidan fotoreportaj tayyorladi.
Usmonxon Alimov 1950-yil 1-yanvarda Samarqand viloyati Ishtixon tumanida tug‘ilgan. Buxoro shahridagi Mir Arab madrasasida, Toshkent islom institutida, Marokash davlatining Qaraviyyin universitetida tahsil olib, islom dini asoslarini, arab va fors tillarini chuqur o‘rgangan.
U 2000—2006-yillarda O‘zbekiston musulmonlari idorasining Samarqand viloyati vakili, bosh imom-xatibi sifatida ishlagan. 2006-yildan to hozirga qadar O‘zbekiston musulmonlari idorasi raisi, muftiy lavozimida ishlab kelayotgan edi. Muftiy Usmonxon Alimov 2021-yilda dunyoning eng nufuzli musulmonlari ro‘yxatidan o‘rin olgan.
Avvalroq Prezident Shavkat Mirziyoyev ta’ziyali xonadonga tashrif buyurib, marhumning farzandlari va yaqinlariga hamdardlik bildirgani to‘g‘risida xabar berilgandi.
Izoh (0)