Germaniyalik afsonaviy futbolchi Gerd Myuller 15-avgust kuni 75 yoshida vafot etdi.
Bu haqda “Bavariya” klubi matbuot xizmati ma’lum qildi. Avvalroq sobiq futbolchi alsgeymer xastaligi bilan kurashayotgani xabar qilingandi.
Myuller “Bavariya” safida to‘rt martadan GFR (Germaniya federativ Respublikasi) chempionati va Kubogida g‘olib chiqqan, uch bor Yevropa Chempionlar Kubogini qo‘lga kiritgan. Shuningdek, u myunxenliklar safida UEFA Kuboklar Kubogi va Mintaqalararo Kubokda g‘olib chiqqan.
GFR terma jamoasida Myuller 1974-yilgi Jahon Chempionati va 1972-yilgi Yevropa chempionatida g‘olib bo‘lgan.
Uning hisobida ikkita “Oltin butsi” (1970, 1972) va bitta “Oltin to‘p” (1970) sovrini bor. U GFR chempionatining eng yaxshi to‘purari hisoblanadi.
Izoh (0)