Qirg‘iziston sobiq prezidenti So‘ronboy Jeenbekov Qumtor konini qazish bo‘yicha loyihadagi korrupsiya holatlari yuzasidan so‘roq qilindi. Qirg‘iziston Milliy xavfsizlik davlat qo‘mitasi (MXDQ) ma’lum qilishicha, Jeenbekov so‘roqqa guvoh sifatida chaqirilgan.
“Jeenbekov bilan tergov harakatlari davom etadi. Olib borilgan tergov natijalariga ko‘ra aybdor deb topilgan jinoyat ishi ishtirokchilarining barchasiga egallab turgan lavozimi, xizmatlari va orden-nishonlaridan qat’i nazar, xolisona yuridik baho beriladi”, — deya ma’lum qilishdi MXDQdan.
Avvalroq qo‘mita “Qumtor” loyihasi ishi bo‘yicha Idoralararo tergov guruhi 2017-yilda ushbu loyiha bo‘yicha strategik bitim tuzilishi bilan bog‘liq voqealarni tergov qilishning faol bosqichini boshlagan edi.
Sobiq prezidentning ukasi, Jogorku Kenesh deputati Asilbek Jeenbekov avvalroq “Qumtor” ishi bo‘yicha qo‘lga olingan bo‘lib, ayni paytda MXDQ izolyatorida saqlanmoqda.
Shuningdek, deputatlar va sobiq bosh vazirlar Muhammadkaliy Abilgaziyev va Temir Sariyev ham hibsga olingan. Sobiq hukumat rahbari Omurbek Babanov mamlakatni tark etmaslik haqidagi tilxat bilan qo‘yib yuborilgan.
Qirg‘izistonning birinchi va ikkinchi prezidentlari Asqar Akayev va Qurmanbek Bakiyevlar iyul oyi boshlarida “Qumtor” ishi bo‘yicha xalqaro qidiruvga berilgandi. Asqar Akayev 2-avgust kuni Qirg‘izistonga qaytdi. Bishkekda u avvaliga so‘roqqa tutilgan, keyin prezident Sadir Japarov uni shaxsan qabul qilgan.
Akayev vataniga qaytib kelish imkoniyatini taqdim etgani uchun Sadir Japarovdan minnatdor ekanini bildirdi hamda “Qumtor” ishi bo‘yicha tergovga yordamlashishga tayyorligini aytdi.
Asqar Akayev yo‘l qo‘ygan xatoliklari uchun hamda “Qumtor” loyihasini amalga oshirish chog‘ida umidlarni oqlamagani uchun qirg‘iz xalqidan uzr so‘radi. Qirg‘iziston sobiq prezidenti “Qumtor” ishi bo‘yicha Milliy xavfsizlik davlat qo‘mitasida so‘roq qilinganidan keyin mamlakatni yana tark etdi.
Keyinroq Qirg‘iziston Milliy xavfsizlik davlat qo‘mitasi (MXDQ) Bosh prokuratura bilan birgalikda “Qumtor” loyihasi bo‘yicha kelishuvlarni bekor qilish jarayonini boshladi.
Izoh (0)