Shimoliy Koreya televideniyesi Tokio—2020 Olimpiadasi o‘yinlarini uch hafta kechiktirib namoyish qila boshladi. Bu haqda NK News xabar berdi.
10-avgust kuni mamlakatning asosiy telekanali KCTV 21-iyul kuni bo‘lib o‘tgan Buyuk Britaniya va Chili ayollar futbol jamoalari o‘rtasidagi o‘yinni namoyish etdi. O‘yin 70 daqiqa davomida sharhlovchining sharhlarisiz va sifati past holda efirga uzatilgan.
“Ekrandagi barcha belgilar xiralashtirilgan. Bu litsenziyasiz videoyozuv bo‘lishi mumkin”, — deya fikr bildirdi nashr. Portal Pxenyandan bu yilgi Tokio o‘yinlaridan biror videomaterial olgani haqida rasmiy ma’lumot so‘radi, biroq tahririyatga javob kelmadi.
Qayd etilishicha, internet va xalqaro telekanallarga kirish taqiqlangan Shimoliy Koreyada fuqarolarni Olimpiada o‘yinlarini ko‘rishdan mahrum qilish g‘ayrioddiy hodisa emas. KCTV translyatsiyalari odatda bir necha haftalab, ba’zan hatto yillab kechiktiriladi.
Bu yil KXDR sportchilari Olimpiadaga bormadi, ular o‘yinlarni tezroq yoritishga turtki bo‘lishi mumkin edi. Aprel oyida Shimoliy Koreya COVID-19 pandemiyasidan xavotirlanib, Olimpiadada qatnashmasligini e’lon qildi.
Izoh (0)