Afg‘oniston IIV xodimlari Kobul yo‘lida “Tolibon” egallab olgan G‘azni viloyatining hokimi Dovud Lagmaniyni hibsga oldi. Bu haqda mahalliy OAV hamda Afg‘oniston ichki ishlar vazirligi matbuot kotibi Mirvays Stanekzayga asoslanib “Interfaks” xabar qilgan.
Mahalliy matbuot gubernator va uning administrasiyasi xodimlarini “Tolibon” vakillariga jangsiz taslim bo‘lish va hududni topshirganlikda ayblamoqda.
“Afg‘oniston viloyatining gubernatori ‘Tolibon’ bilan kelishgan, u va politsiya boshlig‘iga Kobulga ketishiga ruxast berilgan”, — degan Stanekzay.
Avval internetda qurollangan “Tolibon” vakillarining shaharda erkin harakatlanayotgani aks etgan videolar tarqalgandi.
“G‘azni shahrida dushmanning ko‘plab muhim obyektlari egallandi va endi ‘Tolibon’ a’zolari gubernator qarorgohi tomon yo‘l olmoqda”, — deb yozgan “Tolibon” matbuot kotibi Zabihulla Mujohid.
Lagmaniy bir necha oy avval Afg‘oniston prezidenti Ashraf G‘ani tomonidan Forob viloyatining gubernatorligiga tayinlangan, biroq mahalliy aholi norozilik namoyishlari o‘tkazib, uni lavozimidan chetlatishni talab qilgan. Namoyishlar vaqtida politsiya hamda norozilik bildirayotgan xalq to‘qnashuvlari oqibatida bir necha kishi halok bo‘lgan.
Mahalliy manbalarning xabar berishicha, “Tolibon” G‘azni shahrini egallab olganidan keyin Afg‘oniston harbiy havo kuchlari shaharda jangarilar to‘plangan hududlarga raketa zarbalari berishni boshlagan.
Avval Afg‘oniston moliya vaziri “Tolibon” tufayli davlat daromadlari kamayib ketishi fonida mamlakatni tark etgan, AQSh harbiy razvedkasi “Tolibon”ning Kobulni 90 kun ichida egallab olishi mumkinligini taxmin qilgandi. Shuningdek, Rossiya mudofaa vaziri Sergey Shoygu “Tolibon” harakati vakillari Afg‘onistonning O‘zbekiston va Tojikiston bilan chegaralarini nazorat qilayotgani haqida fikr bildirgan.
Izoh (0)