“Tolibon” 12-avgust kuni oqshomda Afg‘onistondagi uchinchi katta shahar bo‘lgan Hirotni ham egallagan. Bu haqda tashkilot spikeri Zabihullo Mujohid Twitter’dagi sahifasida ma’lum qildi.
AFP’ning Hirotdagi vakili ham shahar politsiya mahkamasi oldida “Tolibon” bayrog‘i o‘rnatilgani haqida xabar bergan.
Bundan tashqari, “Tolibon” mamlakat shimolidagi Turkmaniston bilan chegaradosh Badgis viloyatini, uning ma’muriy markazi — Afg‘onistondagi beshinchi eng katta shahar Kalayi-Nauni ham nazorati ostiga olgan.
Shuningdek, 12-avgustda “Tolibon” G‘azni shahrini va shu nomdagi viloyatni ishg‘ol qilgan. Shahar mamlakat poytaxti Kobuldan 130 kilometr janubi-g‘arbda joylashgan. Talinkot viloyati va uning ma’muriy markazi ham deyarli kurashsiz egallangan.
Afg‘onistondagi eng katta ikkinchi shahar Qandahor “Tolibon” vakillari ixtiyoriga o‘tgan. Bu rasman o‘z tasdig‘ini topmagan, biroq harakatning qurollangan a’zolari shahar ichiga kirgan.
Endilikda “Tolibon” Afg‘onistondagi jami 12 ta viloyat markazini nazorat qilmoqda. AQSh Afg‘onistondagi harbiylarini olib chiqishni boshlaganidan keyin mamlakatda “Tolibon”ning faollashuvi kuzatildi va harakat a’zolari hukumat armiyasiga ketma-ket hujumlar uyushtirmoqda.
Qandahor egallangani haqidagi xabarlardan keyin AQShning Afg‘onistondagi elchixonasi amerikalik fuqarolarga tijorat reyslari orqali mamlakatdan chiqib ketishni tavsiya qilgan.
Izoh (0)