Xitoydagi davlat ommaviy axborot vositalari COVID-19 koronavirus infeksiyasining paydo bo‘lishi haqidagi surishtiruvlarda shveysariyalik olim Uilson Edvardsning xulosalariga asoslangan, olim AQShni JSST faoliyatini siyosiylashtirganlikda ayblagandi. Shveysariya elchixonasi bu kabi xabarlarning feyk ekani, mamlakatda bunday ism-sharifli olimning umuman yo‘qligini ma’lum qildi. TJournal nashri mazkur holatning tafsilotlari haqida ma’lumot bergan.
Xitoy nashrlarida, ijtimoiy tarmoqlarda tez-tez ilmiy fikrlaridan iqtiboslar keltirilayotgan Uilson Edvardsni qidiryapmiz. Agar siz hayotda bo‘lsangiz, siz bilan tanishishni istardik! Ammo bu kabi xabarlar aslida feyk ekanligining ehtimoli yuqori, biz ijtimoiy tarmoqlar foydalanuvchilaridan bunday axborotlarni o‘chirib tashlashni so‘raymiz.Shveysariyaning Xitoydagi elchixonasi bayonoti
BBC bergan ma’lumotlar bo‘yicha biolog Uilson Edvardsning so‘zlaridan CGTN, Shanghai Daily hamda Global Times kabi nashrlar ham iqtiboslar keltirgan. Masalan, Shanghai Daily biologning koronavirusning Xitoyda sun’iy ravishda yaratilgani yuzasidan JSST mutaxassislari guruhining hisobotida taxminiylik va masalani siyosiylashtirish borligidan xavotirda ekanligi haqida yozgan.
“AQSh Xitoyga virusning kelib chiqishi masalasida hujum qilishga shu qadar berilib ketdiki, real ma’lumot va xulosalarga ham ko‘z yummoqda”, — deya Edvards so‘zlarini keltirgan Xitoy nashrlari.
Barcha nashrlar olimning Facebook’dagi sahifasidagi postlarga havola bergan. Shveysariya elchixonasi biologning profili ikki hafta avval yaratilgani va unga atigi uchta foydalanuvchi obuna bo‘lganiga e’tibor qaratgan. Postlarni boshqalarga ulashganlar orasida Xitoyning Shanghai Daily nashri hamda Pokistondagi xitoylik diplomat bor.
Shveysariya diplomatik vakolatxonasi mamlakat fuqarolari reyestrida Uilson Edvards ism-sharifli shaxs yo‘qligini bildirgan. Shuningdek, Shveysariyada bunday odamning hech qanday akademik maqolasi ham nashr qilinmagan.
Twitter foydalanuvchilari aslida hayotda yo‘q biolog voqeasi bo‘yicha hajviy matn va suratlar bilan bo‘lishishni boshlagan.
“Ular shveysariyalik olimga “shveysar” tilida ism bera olishmadimi? LOL”, — deb yozgan boshqa bir foydalanuvchi.
“Mening ismim Uilson Edvards, meni o‘g‘irlab ketib Xitoyga olib kelishgan, mamlakat hukumati fuqaroligimni va ismimni o‘zgartirgan. Mening uyga qaytishimga yordam berasiz degan umiddaman”.
Xitoydagi Shveysariya elchixonasining xabaridan keyin barcha OAVlarda biologning izohlari o‘chirib tashlandi. Uilson Edvardsning Facebook’dagi profili ham yo‘qolib qoldi.
Pandemiya boshlanganidan buyon AQShning ayrim rasmiylari COVID-19 ning Uxandagi laboratoriyada sun’iy yo‘l bilan yaratilganini taxmin qilib keladi. Mamlakat sobiq prezidenti Donald Tramp ham shunday fikrda edi. Shuningdek, AQSh razvedkasi koronavirusning sun’iy tarzda yaratilib, tarqatilganligining ehtimoli o‘rganilayotganini bildirgan.
2021-yil mayda The Wall Street Journal AQSh mutaxassislarining axborotlariga tayanib, koronavirusning Uxandagi laboratoriyadan tarqalib ketgani haqida material chop etdi. Shu oyning o‘zida AQSh prezidenti Jo Bayden mamlakat razvedkasiga virusning kelib chiqishi bo‘yicha ma’lumotlarni to‘plash ishlarini kuchaytirish to‘g‘risida ko‘rsatma bergan.
Shundan keyin JSST COVID-19 ning laboratoriyadan tashqariga chiqib ketganini inkor etmadi va koronavirusning kelib chiqishini tekshirishning ikkinchi bosqichiga tayyorgarlik ko‘rish ishlarini boshlab yubordi. Xitoy bunga javoban tashkilotni siyosiylashganlikda aybladi va u bilan hamkorlik qilmasligini bildirdi.
Izoh (0)