Jizzax viloyatining Zomin tumanida sodir bo‘lgan yo‘l-transport hodisasi oqibatida haydovchilardan biri halok bo‘ldi, deb xabar beradi IIV matbuot xizmati.
Ma’lum qilinishicha, tuman hududidan o‘tgan Qo‘qon–Jizzax A 376 yo‘lining 256-kilometrida Nexia avtomobili “Zil-138” yuk mashinasi bilan to‘qnashgan. Oqibatda tumanning Beshyuz qishlog‘ida istiqomat qilgan B.O‘. boshqaruvidagi Nexia to‘liq yonib ketgan. Haydovchini avtoulovdan chiqarib olishning iloji bo‘lmagan va u voqea joyida halok bo‘lgan.
Ko‘ngilsiz hodisaga yengil mashina haydovchisining uxlab qolishi natijasida “Zil-138” yo‘liga chiqib ketishi sabab bo‘lgani aytilmoqda. Holat yuzasidan jinoyat ishi qo‘zg‘atilgan.
Avvalroq Dehqonobodda Lacetti va Isuzu to‘qnashishi natijasida yong‘in chiqqani va 4 nafar fuqaro vafot etgani to‘g‘risida xabar berilgandi.
Izoh (0)