Жиззах вилоятининг Зомин туманида содир бўлган йўл-транспорт ҳодисаси оқибатида ҳайдовчилардан бири ҳалок бўлди, деб хабар беради ИИВ матбуот хизмати.
Маълум қилинишича, туман ҳудудидан ўтган Қўқон–Жиззах А 376 йўлининг 256-километрида Nexia автомобили «Зил-138» юк машинаси билан тўқнашган. Оқибатда туманнинг Бешюз қишлоғида истиқомат қилган Б.Ў. бошқарувидаги Nexia тўлиқ ёниб кетган. Ҳайдовчини автоуловдан чиқариб олишнинг иложи бўлмаган ва у воқеа жойида ҳалок бўлган.
Кўнгилсиз ҳодисага енгил машина ҳайдовчисининг ухлаб қолиши натижасида «Зил-138» йўлига чиқиб кетиши сабаб бўлгани айтилмоқда. Ҳолат юзасидан жиноят иши қўзғатилган.
Аввалроқ Деҳқонободда Lacetti ва Isuzu тўқнашиши натижасида ёнғин чиққани ва 4 нафар фуқаро вафот этгани тўғрисида хабар берилганди.
Изоҳ (0)