Volkswagen korxonasi hududidagi oshxona 2025-yildan boshlab o‘zining karrivurst nomli sosiskalarini sotishdan voz kechib, vegetariancha menyuga o‘tadi. Birinchi bo‘lib Volfsburgdagi oshxona avgust oxiriga borib go‘shtli taomlarni sabzavotli likopchalar va baqlajonli burgerlarga almashtiradi. Ta’kidlanishicha, so‘nggi bir necha yildan buyon aynan sosiskalar Volkswagen’ning eng talabgir mahsuloti hisoblanadi, deb xabar beradi Motor.
Hozircha bu kabi taqiq faqatgina kompaniyaning shtab-kvartirasida joylashgan oshxonaga taalluqli. Marka bosh direktori ushbu masalani Volkswagen bosh oshpazi bilan muhokama qilgan va ular vegetariancha yegulik foydasiga qaror qabul qilgan.
Umuman olganda, karrivurst (ketchup yoki tomat pastasi bazasidagi maxsus sousda qovurilgan sardelka) menyudan butunlay yo‘qolib ketmaydi. Rahbariyatning maqsadi xodimlarning salomatligini ta’minlash — kompaniya go‘shtli mahsulotlar hajmini kamaytirib, sabzavotlardan tayyorlanadigan ovqatlar sonini oshirish niyatida.
Shu bilan birga, kompaniya xodimlari bu kabi o‘zgarishlarga shubha bilan qaramoqda. Yaqinda Volfsburgdagi Golf modelini yig‘ish bilan shug‘ullanadigan liniya xodimlariga tushlikka karrivurst berish to‘xtatilgan va ular jamoaviy shikoyat bilan kasaba uyushmasiga murojaat qilgan. Shundan so‘ng, sosiskalar yana menyuga qaytarilgan.
Nemis avtomobilsozlik kompaniyasi 1973-yildan buyon Volfsburgdagi zavodda karrivurst ishlab chiqarib keladi. Kompaniya kuniga 18 ming donadan ortiq sosiska chiqaradi va ularning ehtiyot qismlar katalogida o‘z raqami ham bor, har bir qadoqqa VW original Part markirovkasi qo‘yiladi.
Izoh (0)