Qarshi shahridagi Mustaqillik shoh ko‘chasida harakatlanib ketayotgan avtomobil yonib ketdi. Bu haqda “Daryo”ga viloyat Favqulodda vaziyatlar boshqarmasi axborot xizmati rahbari Sohib Vaitov xabar berdi.

Foto: Sohib Vaitov

Ma’lum bo‘lishicha, bugun, 30-iyul kuni soat taxminan 10:45 da Qarshi shahar Favqulodda vaziyatlar bo‘limiga Qarshi shahar, Mustaqillik shoh ko‘chasida harakatlanib borayotgan avtomobilda yong‘in sodir bo‘layotgani haqida xabar kelib tushgan.

Xabarga ko‘ra, Qarshi shahar FVB 3-PYOQ qismida 1 ta yong‘in-qutqaruv bo‘linmasi jalb etilgan. Yong‘in-qutqaruvchilar soat taxminan 10:51 da voqea joyiga yetib borib, soat 11:05 da yong‘inni to‘liq o‘chirgan.

Foto: Sohib Vaitov

Aniqlanishcha, ushbu avtomobil Qarshi shahrida yashovchi fuqaroga tegishli Nexia bo‘lib, yong‘indan hech kim kuyish tan jarohatini olmagan. Yong‘in sababi va zarari aniqlanmoqda.