O‘zbekistonda 2021-yil o‘tgan davrida onlayn-auksionlar orqali 168,7 milliard so‘mlik 83,2 mingdan ziyod “chiroyli” avtoraqamlar sotildi. Bu haqda AOKAda Respublika tovar-xomashyo birjasi mutasaddilari ishtirokida bo‘lib o‘tgan matbuot anjumanida ma’lum qilindi.
Qayd etilishicha, 2021-yilning 7 oylik yakunlariga ko‘ra birja savdolari orqali 797,3 ming dekalitr etil spirti, 12,6 ming tonna polivinilxlorid, 1225 tonna formalin va 224 kilogramm kumush sotildi.
O‘zbekiston respublika tovar-xomashyo birjasining barcha savdo platformalarida tuzilgan bitimlarning umumiy hajmi 2020-yilning mos davriga nisbatan 46,7 foizga o‘sib, qariyb 46,0 trillion so‘mni tashkil qildi. Bunda tuzilgan bitimlar hajmining 87 foizi birja savdolariga, qolgan qismi esa elektron tijorat savdo tizimlari, shu jumladan, ko‘rgazma-yarmarka savdolari, elektron davlat xaridlari, avtoraqam va mobil raqam onlayn auksionlariga to‘g‘ri keldi.
Yanvar—iyul oylarida elektron davlat xaridlari bo‘yicha tuzilgan bitimlarning umumiy hajmi 2020-yilga nisbatan deyarli 2,4 barobarga oshib, 4 trillion 670 milliard 3 million so‘mga teng bo‘ldi. Bunda budjet va korporativ buyurtmachilari mablag‘larining tejalishi ikki marotabaga o‘sib, 840,6 milliard so‘mni tashkil qildi.
Ko‘rib chiqilayotgan davrda “avtoraqam.uzex.uz” saytida onlayn-auksionlar orqali 168,7 milliard so‘mlik 83,2 mingdan ziyod “chiroyli” avtoraqamlar sotildi. Bunda, avtoraqamlarning sotuvi son jihatdan 2,4 barobarga, hajmi bo‘yicha — 42 foizga o‘sdi. Sotilgan avtoraqamning eng past bahosi — 450,5 ming so‘mni, eng qimmat avtoraqamning qiymati esa 441,5 million so‘mni tashkil qildi. Tuzilgan bitta bitimning o‘rtacha qiymati 2 million so‘mga teng bo‘ldi.
Bundan avval O‘zbekistonda istalgan fuqaro UZB, AAA seriali avtoraqamlarni auksion orqali sotib olishi mumkinligi hamda O‘zbekistonga qalbaki avtoraqamlar olib kirilayotgani aniqlangani haqida xabar berilgandi.
Izoh (0)