Toshkent viloyatida ekstremistik faoliyat bilan shug‘ullanib kelayotgan bir guruh shaxslar aniqlandi

Toshkent viloyatida ekstremistik faoliyat bilan shug‘ullanib kelayotgan shaxslar aniqlandi, deya xabar bermoqda viloyati IIBB axborot xizmati.

Toshkent viloyatning Zangiota tumanida viloyat prokuraturasi, Davlat xavfsizlik xizmati va boshqa huquqni muhofaza qiluvchi idoralar bilan hamkorlikda o‘tkazilgan “Xavfsiz hudud” tezkor tadbiri davomida yashirin ravishda ekstremistik faoliyat bilan shug‘ullanib kelayotgan bir guruh shaxslar aniqlandi.

Hozirda ushbu shaxslarning xatti-harakatlariga qonuniy baho berish bo‘yicha surishtiruv ishlari olib borilmoqda.

Shuningdek, yonida tig‘li jism olib yurish, belgilangan karantin va pasport-viza qoidalarini buzish, jamoat joyida spirtli ichimlik iste’mol qilish, bezorilik hamda noqonuniy ov quroli saqlash kabi bir nechta holatlar aniqlanib belgilangan tartibda chora ko‘rilgan.

Bundan avval Toshkentda o‘ta og‘ir jinoyat sodir etganlikda gumonlanayotgan shaxs qidirilayotgani, Qo‘qonda Suriyadagi terrorchilik tashkiloti tarkibiga kirmoqchi bo‘lgan “Jihodchilar” oqimi tarafdorlari faoliyatiga chek qo‘yilgani hamda Sirdaryo va Surxondaryoda terrorchilik tashkiloti a’zolari ushlangani haqida xabar berilgandi.