Ukrainaning Bees Airline aviakompaniyasi 2021-yil 9-avgustidan Kiyev—Samarqand—Kiyev yo‘nalishidagi reyslarga chiptalar sotuvi boshlanganini e’lon qildi. Transport vazirligi matbuot xizmati ushbu aviakompaniya tomonidan O‘zbekistonga parvozlarni yo‘lga qo‘yish yuzasidan murojaatlar bo‘lmaganini ma’lum qildi.
Transport vazirligining qayd etishicha, Bees Airline aviakompaniyasi tomonidan muntazam parvozlarni yo‘lga qo‘yish bo‘yicha ham, bir martalik charter parvozlarni bajarishni tashkil etish yuzasidan ham “O‘zaviatsiya” agentligiga shu vaqtga qadar hech qanday so‘rov kelib tushmagan.
“Xorijiy mamlakatlar aviakompaniyalari O‘zbekiston fuqaro aviatsiyasi aerodromlariga bir martalik (charter) reyslarni amalga oshirish uchun vakolatli organning O‘zbekiston Respublikasi Transport vazirligi huzuridagi Fuqaro aviatsiyasi agentligining tegishli ruxsatnomasini olishi va ana shundan so‘ng aviachiptalar sotuvini boshlashi lozim.
Zero vakolatli organning charter qatnovini bajarish bo‘yicha tegishli ruxsatnomasi mavjud emasligi natijasida aviakompaniyalar tomonidan e’lon qilingan yo‘nalishdagi parvozning bekor qilinishi yo‘lovchilar orasida ijtimoiy keskinlikning vujudga kelishiga olib keladi”, — deb ta’kidlangan vazirlik xabarida.
Shu munosabat bilan Transport vazirligi bugungi kunda O‘zbekiston va Ukraina aviatsiya ma’muriyatlari o‘rtasida faqatgina Toshkent—Kiyev yo‘nalishida parvozlarni amalga oshirish yuzasidan kelishuv mavjudligini eslatib o‘tib, xorijiy aviakompaniyalardan yo‘lovchilarning huquqlari va tashuvchining majburiyatlariga qat’iy rioya etishga chaqirgan.
Samarqand viloyati turizm va sport bosh boshqarmasi matbuot xizmati xabariga ko‘ra, 10-avgust kuni O‘zbekistonning Kiyev shahrida joylashgan Ukrainadagi elchixonasida Kiyevdan Samarqand shahriga muntazam reyslar ochilishi munosabati bilan tantanali tadbir bo‘lib o‘tdi. Tadbirni O‘zbekistonning Ukrainadagi elchisi Alisher Kurmanov ochgan. Ushbu xabarda ham Ukraina davlatining loukosterlardan biri bo‘lgan Bees Airline Samarqandga birinchi parvozini 30-avgustdan boshlab ishga tushirishni rejalashtirayotgani qayd etilgan.
Eslatib o‘tamiz, O‘zbekiston va Ukraina o‘rtasida to‘g‘ridan to‘g‘ri doimiy parvozlarni tiklash masalasi uzoq vaqtdan beri muhokama qilib kelinmoqda. Uzbekistan Airways Toshkent—Kiyev—Toshkent yo‘nalishida parvozlarni amalga oshirishni 2015-yilning may oyida to‘xtatgan.
Izoh (0)