Yaponiyada ota-onalar qarindoshlariga yangi tug‘ilgan bola ko‘rinishidagi guruch qoplarini yuborishi kabi noodatiy xizmat turi paydo bo‘ldi, deb xabar beradi Esquire.
Ichida guruchi bor qoplar og‘irligi haqiqiy chaqaloqning og‘irligichalik, qadoqda esa bolaning surati yopishtirilgan. Nashrning yozishicha, bu kabi xizmatga pandemiya fonida talab ortgan, chunki endigina ota-onaga aylangan insonlar qarindoshlarinikiga borib, o‘z farzandini ko‘rsata olmayapti.
Bu kabi qopchalar turlicha dizaynga ega, jumladan, ularning ayrimlari yo‘rgakka o‘ralgan bolaning shaklini takrorlaydi — bu odamlar yangi tug‘ilgan chaqaloqni qo‘lda ko‘tarib ko‘rish qanday bo‘lishini tasavvur qilishi uchun.
Guruch og‘irligi chaqaloqning tug‘ilgan vaqtidagi vazniga teng va u qancha og‘ir bo‘lsa, qop shuncha qimmat bo‘ladi. Ayrim firmalar bir gramm guruch uchun bir iyena olmoqda. 3,5 kilogrammlik shu kabi qadoq narxi 31 dollarni tashkil etadi.
“Bu kabi g‘oya birinchi bor 14 yildan oldin, o‘g‘lim tug‘ilganida va uzoqdagi qarindoshlarim uni ko‘rgani kela olmaganida paydo bo‘lgan edi. Shunday qilib, biz chaqaloqning og‘irligicha keladigan guruchli qoplarni ishlab chiqib, qarindoshlarni shu orqali xursand qilishga qaror qildik”, — deydi guruch do‘koni egasi Naruo Ono.
Xaridorlarning ijobiy bahosidan keyin Ono ushbu xizmat mashhurlikka erishishini taxmin qilib, “guruch bolalar”ni butun mamlakat bo‘ylab sotishni yo‘lga qo‘ygan.
Oradan biroz vaqt o‘tgach tadbirkor o‘z assortimentini kengaytirib, to‘y guruchlarini sotishni boshlagan. “Kelin va kuyov o‘zlarining ota-onasiga chaqaloqlikdagi suratlari tushirilgan guruch qopini sovg‘a qilishi mumkin”, — deydi Ono.
Izoh (0)