Японияда ота-оналар қариндошларига янги туғилган бола кўринишидаги гуруч қопларини юбориши каби ноодатий хизмат тури пайдо бўлди, деб хабар беради Esquire.
Ичида гуручи бор қоплар оғирлиги ҳақиқий чақалоқнинг оғирлигичалик, қадоқда эса боланинг сурати ёпиштирилган. Нашрнинг ёзишича, бу каби хизматга пандемия фонида талаб ортган, чунки эндигина ота-онага айланган инсонлар қариндошлариникига бориб, ўз фарзандини кўрсата олмаяпти.
Бу каби қопчалар турлича дизайнга эга, жумладан, уларнинг айримлари йўргакка ўралган боланинг шаклини такрорлайди — бу одамлар янги туғилган чақалоқни қўлда кўтариб кўриш қандай бўлишини тасаввур қилиши учун.
Гуруч оғирлиги чақалоқнинг туғилган вақтидаги вазнига тенг ва у қанча оғир бўлса, қоп шунча қиммат бўлади. Айрим фирмалар бир грамм гуруч учун бир иена олмоқда. 3,5 килограммлик шу каби қадоқ нархи 31 долларни ташкил этади.
«Бу каби ғоя биринчи бор 14 йилдан олдин, ўғлим туғилганида ва узоқдаги қариндошларим уни кўргани кела олмаганида пайдо бўлган эди. Шундай қилиб, биз чақалоқнинг оғирлигича келадиган гуручли қопларни ишлаб чиқиб, қариндошларни шу орқали хурсанд қилишга қарор қилдик», — дейди гуруч дўкони эгаси Наруо Оно.
Харидорларнинг ижобий баҳосидан кейин Оно ушбу хизмат машҳурликка эришишини тахмин қилиб, «гуруч болалар»ни бутун мамлакат бўйлаб сотишни йўлга қўйган.
Орадан бироз вақт ўтгач тадбиркор ўз ассортиментини кенгайтириб, тўй гуручларини сотишни бошлаган. «Келин ва куёв ўзларининг ота-онасига чақалоқликдаги суратлари туширилган гуруч қопини совға қилиши мумкин», — дейди Оно.
Изоҳ (0)