O‘zbekistonda 10-avgust kuni “Yetim bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlashning yangi tizimini joriy etish chora-tadbirlari to‘g‘risida” Prezident qarori qabul qilindi.
Unga ko‘ra, yetim bolalarga uy-joy ajratishning yangi tizimi joriy etilmoqda:
- uy-joyga muhtoj va 18 yoshga to‘lgan yetim bola uchun (25 kvadrat metrdan kam bo‘lmagan) 1 xonali, ular o‘rtasida tuzilgan oila uchun (50 kvadrat metrdan kam bo‘lmagan) 2 xonali uy-joy ajratiladi.
- uy-joy yetim bolaning xohishiga ko‘ra, uning qarindoshlari yashaydigan yoki boshqa hududda yangi qurilgan ko‘p kvartirali uylardan, nogironligi bo‘lgan yetim bolalarga esa birinchi qavatdan onlayn navbat (2022-yil 1-sentabrdan “Ijtimoiy himoya yagona reyestri”) asosida ajratiladi;
- yetim bolalarga uy-joylar mulkka egalik qilish huquqi bilan, biroq bola 30 yoshga to‘lgunicha uni sotish, garovga qo‘yish, ijaraga berish, oila a’zosi bo‘lmagan shaxslarni ro‘yxatga qo‘yish huquqisiz beriladi;
- 2021-yil 1-dekabrga qadar 757 nafar yetim bolalarga uy-joy ajratish bo‘yicha maqsadli parametr (oxirgi 10 yilda ajratilgan uy-joylar sonidan 1,2 baravar ko‘p) tasdiqlanmoqda.
Ma’lumot uchun, 2011—2020-yillarda mahalliy hokimliklar tomonidan 610 nafar yetim bolalarga uy-joy berilgan. Bunda ushbu uy-joylarning 147 tasi joriy, 15 tasi kapital ta’mirga muhtoj, 1 tasi yashash uchun mutlaqo yaroqsiz holatda va 10 tasi belgilangan ijtimoiy normalarga to‘g‘ri kelmaydi. Hozirda yetim bolalar uchun uy-joy bo‘sh turgan yotoqxona va qarovsiz qolgan uy-joylardan ajratib kelinmoqda.
Eslatib o‘tamiz, O‘zbekistonda 18 yoshga to‘lgan, uy-joyga muhtoj yetim bolalarga yangi qurilgan uy-joylar bepul ajratilishi haqida Shavkat Mirziyoyev 28-iyulda o‘tkazilgan yig‘ilishda ma’lum qilgandi. Yig‘ilishda Prezident viloyat hokimlariga 1-oktabrga qadar 757 nafar yetim bolani uy-joy bilan ta’minlash vazifasini qo‘ygandi.
Izoh (0)