O‘zbekiston Sanitariya-epidemiologik osoyishtalik va jamoat salomatligi xizmati ko‘rsatmasi bilan 9-avgustdan boshlab aholini o‘zbek-xitoy vaksinasining 2- va 3-dozasi bilan emlash vaqtincha to‘xtatilgandi. Innovatsion rivojlanish vazirligi matbuot xizmati bu ZF-UZ-VAC 2001 vaksinasi bilan boshlangan ommaviy emlash jarayoniga salbiy ta’sir qilmasligini ma’lum qildi.
“Emlashning qisqa muddatli kechiktirilishi 1- yoki 2-dozadan keyin vaksina tufayli organizmda hosil bo‘ladigan antitanalar miqdoriga yoki boshqa ko‘rsatkichlarga ta’sir ko‘rsatmaydi.
Ilmiy-tadqiqotlar hamda ko‘p sonli aholi o‘rtasidagi ommaviy emlashning dastlabki natijalariga ko‘ra Xitoy dori vositalarini nazorat qilish agentligi (CDC) tomonidan vaksinaning 1-dozasi va 2-dozasi o‘rtasidagi oraliqni 2 oygacha cho‘zishga, ikkinchi va uchinchi dozalar oralig‘ini esa 3 oygacha cho‘zishga ruxsat berilgan va Xitoyda bu amaliyot joriy qilingan. Hozirda Xitoyda mazkur ZF-UZ-VAC 2001 vaksina bilan 0, 2, 6 oy sxemasida 140 million kishi emlangan va jarayon davom etmoqda.
ZF-UZ-VAC 2001 vaksinasi ustida borilgan tadqiqotlar ikkinchi va uchinchi dozalar oralig‘idagi vaqtning uzayishi ko‘proq antitanalarning hosil bo‘lishi va u ko‘proq muddat davomida saqlanib qolishiga zamin yaratishini tasdiqlamoqda. Bu to‘g‘risidagi ma’lumotlar quyidagi havoladagi ilmiy maqolada keltirilgan: www.biorxiv.org ZF-UZ-VAC-2001 vaksinasini ishlab chiqaruvchilar tomonidan berilgan ma’lumotlarga ko‘ra, ikkinchi va uchinchi doza o‘rtasidagi vaqt intervalini oshirish koronavirusning turli shtammlariga nisbatan neytrallashuvchi titrlarining oshishiga olib keladi”, — deyiladi vazirlik xabarida.
Shuningdek, Sanitariya-epidemiologik osoyishtalik va jamoat salomatligi xizmati tomonidan zaxiradagi ZF-UZ-VAC-2001 o‘zbek-xitoy vaksinasini faqat 1-doza bilan emlashga ko‘rsatma berilishi tufayli ijtimoiy tarmoqlarda tarqalgan “vaksinaning aholi bilmaydigan qandaydir nojoiz ta’siri chiqqani” to‘g‘risidagi taxminlar yoki “vaksina yetishmas ekan” degan mish-mishlar asossiz ekani ham bildirildi.
“Agar vaksinaning nojo‘ya ta’siri aniqlanganida, Sog‘liqni saqlash vazirligi tomonidan aholi ZF-UZ-VAC2001 vaksinasining 1-dozasi bilan emlanishiga ruxsat berilmagan bo‘lar edi. Qolaversa, joriy yilning 5—6-avgust kunlari 2 million doza ZF-UZ-VAC2001 vaksinasi yurtimizga olib kelindi va shu oyning ichida yana 2 million doza olib kelinadi. Hukumat tomonidan O‘zbekistonda ikki turdagi vaksinani, jumladan, ZF-UZ-VAC2001 vaksinasini ishlab chiqarish bo‘yicha amaliy ishlar olib borilmoqda va avgust oyining oxiriga qadar bu ishlar yo‘lga qo‘yiladi”, — deb ta’kidlangan xabarda.
Sog‘liqni saqlash vazirligi ma’lumotlariga ko‘ra, 9-avgustga kelib 10 663 284 doza vaksinadan foydalanilgan bo‘lib, ulardan 1-bosqich emlanganlar 7 387 495 nafarni, 2-bosqichda emlanganlar 2 377 313 nafarni, 3-bosqich emlanganlar 898 476 nafarni tashkil qildi. Shu kungacha to‘liq emlangan fuqarolar esa 1 360 237 nafarni tashkil qilmoqda.
Vazirlik ma’lumotlariga ko‘ra, O‘zbekistonda vaksina zaxirasi 14 million 580 ming 60 dozani tashkil qilmoqda. Ulardan 370 ming dozasi “Sputnik V”, 710 ming dozasi AstraZeneca, 10,5 million dozasi ZF-UZ-VAC2001, 3 million 60 dozasi Moderna vaksinasidir.
Izoh (0)