“Transport to‘g‘risida”gi qonun 9-avgust kuni Prezident tomonidan imzolandi, deb xabar bermoqda Adliya vazirligi matbuot xizmati.
Qonunga ko‘ra, avtomobil, havo, temiryo‘l, suv, elektr transporti, metropoliten va transport infratuzilmasi obyektlari O‘zbekistonning yagona transport tizimini tashkil etadi.
Transport vazirligi sohada maxsus vakolatli davlat organi hisoblanadi. Davlat organlari va mansabdor shaxslar transport tashkilotlarining xo‘jalik faoliyatiga aralashishga hamda ular xodimlarini boshqa ishlarga jalb etishga haqli emas.
Qonunga ko‘ra, transport vositalari muvofiqlik yoki transport vositasi turini ma’qullash sertifikatiga ega bo‘lishi va ro‘yxatdan o‘tkazilishi kerak. Xavfsizlik talablariga javob bermaydigan transportlarni O‘zbekistonga olib kirish, ishlab chiqarish, sotish yoki ulardan foydalanish taqiqlanadi. Davlat chegarasi orqali o‘tkazish punktlarida yuklarni tranzit olib o‘tish chog‘ida tranzit yuklar va hujjatlar identifikatsiya qilinadi.
Qonunga ko‘ra, O‘zbekistonda tovarlar va transport vositalariga nisbatan bajariladigan operatsiyalardan kelib chiqqan holda xalqaro va hududiy transport-logistika markazlari tashkil etilishi mumkin.
Transport-logistika markazlari ularga har qanday turdagi transportda kirib kelayotgan hamda olib chiqilayotgan yuklarni omborga joylashtirish, saqlash, ularga ishlov berish, qayta ishlash, qadoqlash va taqsimlash bo‘yicha xizmatlar ko‘rsatadi.
Vakolatli organlar vokzalda, aerovokzalda, aeroportda, metropolitenda va avtostansiyaga kirish joyida transport vositasini, bagajni, yuk bagajini va yukni, yo‘lovchilarni va boshqa shaxslarni ko‘zdan kechirishdan o‘tkazishi mumkin.
Shuningdek, foydali qazilmalar joylashgan maydonlarda transport tashkilotlarining obyektlarini loyihalashtirish va qurish, ular joylashgan yerlarda yer osti inshootlarini joylashtirish taqiqlanadi. Alohida hollarda, loyihalashtirish va qurishga Davlat geologiya va mineral resurslar qo‘mitasi ruxsati bilan yo‘l qo‘yiladi.
Transport tashkilotlari va tashuvchilar faoliyati transport harakatlanishi bilan bog‘liq bo‘lgan hamda mehnat sharoitlari o‘ta zararli va o‘ta og‘ir sharoitlarda band bo‘lgan xodimlarning dastlabki hamda davriy tibbiy ko‘riklardan o‘tkazilishini tashkil etishi shart.
Mazkur qonunning qabul qilinishiga qanday zarurat bo‘ldi?
Bugungi kunda transport faoliyatini tartibga soluvchi alohida qonun hujjatlari mavjud bo‘lib, bulardan “Avtomobil transporti to‘g‘risida”gi, “Temiryo‘l transporti to‘g‘risida”gi qonunlar, Havo kodeksi va boshqa ko‘plab qonun hujjatlarini keltirish mumkin. Biroq barcha turdagi transportlarning optimal, muvozanatlashgan va uyg‘unlashgan o‘zaro aloqasini ta’minlaydigan, ularni samarali logistika, aralash yo‘nalishlar sonini kengaytirish orqali yagona transport tarmog‘iga integratsiya qilish yo‘llarini aniqlaydigan yagona qonun yo‘q edi. “Transport to‘g‘risida”gi qonun barcha turdagi transportlarning optimal va muvozanatlashgan o‘zaro aloqasini nazarda tutadi.
Ushbu qonun rasmiy e’lon qilingan kundan e’tiboran 3 oy o‘tgach kuchga kiradi.
Eslatib o‘tamiz, 2019-yilda “Transport sohasida davlat boshqaruvi tizimini tubdan takomillashtirish chora-tadbirlari to‘g‘risida”gi Prezident farmoni bilan O‘zbekiston avtomobil transporti agentligi negizida Transport vazirligi tashkil etilgandi.
Izoh (0)