Davlat bojxona qo‘mitasining Toshkent shahar bojxona boshqarmasi, DXX va IIO xodimlari hamkorlikda o‘tkazilgan ko‘p bosqichli tezkor tadbirda yirik miqdordagi kuchli ta’sir qiluvchi moddalarni aylanma yo‘llar orqali respublika hududiga olib kirib, so‘ngra ularni Toshkentda pullashga uringan jinoiy guruh fosh qilindi.
Toshkentning Bektemir tumanida o‘tkazilgan tezkor tadbirning ilk bosqichida avvaldan kuzatuvga olingan fuqaro boshqaruvidagi Mercedes-Benz Sprinter yuk mashinasi belgilangan tartibda ko‘zdan kechirildi.
Avtomashina yukxonasida bodring solingan qoplar tagida 9 qopda hamda yo‘lovchi o‘rindig‘i ostidagi 1 ta qopda jami 6076 ta flakonda “Tropikamid” tomchi dorilari yashirilgani aniqlandi.
Bektemir tumanida tezkor tadbir davom ettirilib, mazkur dorilarni qabul qilib olishi lozim bo‘lgan shaxs ham qo‘lga olindi. Mazkur dori vositalari keyinchalik shahar dorixonalari bo‘ylab tarqatilishi kerak bo‘lgan.
Ushbu holatda huquqbuzarlardan olib qo‘yilgan “Tropikamid” kuchli ta’sir qiluvchi dori vositalarining umumiy qiymati 1 milliard 93 million 680 ming so‘mni tashkil qilgan.
Yangihayot tumanida o‘tkazilgan tezkor tadbirda ham avvaldan kuzatuvga olingan shaxs boshqaruvidagi Lacetti belgilangan tartibda ko‘zdan kechirildi.
Unda mashina salonida 500 dona flakonda “Tropikamid”, 3 dona “Regapen” kapsulasi, 0,32 gramm gashish va 1 dona elektron tarozi borligi aniqlandi. Tezkor tadbirning navbatdagi bosqichi Chilonzor tumanida davom ettirildi.
Oldindan kuzatuvga olingan 2 nafar shaxs Qatortol ko‘chasida boshqa bir shaxsga 503 dona “Regapen” dori vositasini savdolashayotganida ushlandi. Mazkur holatlar bo‘yicha jinoyat ishlari qo‘zg‘atilib, tergov davom ettirilmoqda.
Bundan avval Yunusobodda 100 dona qalbaki “Remdesivir” dorisini 4 700 AQSh dollariga sotayotgan shaxslar qo‘lga olingani, Yakkasaroyda noqonuniy ravishda 76,8 mln so‘mga “Remdesivir” dorisini sotayotgan shaxslar qo‘lga olingani hamda Ohangaronda pandemiya sharoitida talab yuqori bo‘lgan dori vositalarini 160 mln so‘mga sotayotgan shaxslar ushlangani haqida xabar berilgandi.
Izoh (0)