Коронавирусга чалиниш бўйича илк ҳолатлар АҚШда 2019 йил декабрь ойида, Ухандан анча олдин содир бўлган. Бу ҳақда Хитой Халқ Республикаси Коммунистик партиясининг инглиз тилида чиқадиган The Global Times газетаси хабар берди.
Хусусан, газетадаги мақола муаллифлари Американинг The Palm Beach Post нашрига таяниб, хабар беришича, 2019 йилнинг декабрида ёки 2020 йилнинг январида Флоридада 26 кишининг коронавирус билан касаллангани аниқланган, улардан саккиз нафари хорижга саёҳат қилмаган ёки COVID-19 билан касалланган бошқа беморлар билан алоқада бўлмаган эди. Муаллифларнинг қўшимча қилишича, Флорида ҳукумати май ойида 171 бемор ҳақидаги маълумотларни ўчириб ташлаган. Гап ҳудуддаги COVID-19 билан касалланиш бўйича биринчи ҳолатлар ҳақида бормоқда.
Май ойида Флоридада 171 беморнинг маълумотлари ўчирилгани тўғрисида The Palm Beach Post ёзганди. Нашрда айтилишича, ушбу беморларда коронавируснинг биринчи аломатлари ва тестларнинг ижобий натижалари январь–февраль ойларида — мамлакатда COVID-19 билан касалланиш бўйича дастлабки маълумотлар берилишидан олдин пайдо бўлган.
Муаллифларнинг Соғлиқни сақлаш вазирлигидаги қайдларга асосланиб, даъво қилишича, касаллик фақат Хитойда тарқалмоқда деб ҳисобланилаётган пайтда — 1 январдаёқ АҚШда инфекциянинг илк симптомлари пайдо бўлган.
Кейинчалик, ушбу масала билан шуғулланган маълумот таҳлилчиларидан бири Ребекка Жонс Соғлиқни сақлаш вазирлиги маълумотларидан ноқонуний фойдаланганликда айбланган. Июнь ойида суд журналистга қарши жиноят ишини ёпиш бўйича ҳимоя томонининг аризасини рад этди.
The Global Times, ўз навбатида, Ухань университети вирусологи Янг Чжансюнинг шарҳига таяниб, коронавирус АҚШда Хитойдан эртароқ пайдо бўлган бўлиши мумкинлигини таъкидлади. Газета мақоласи муаллифларининг фикрича, COVID-19 дунёнинг бир қанча жойларида бир вақтнинг ўзида пайдо бўлган бўлиши мумкин.
Пандемия бошланганидан бери АҚШ бир неча бор Хитой ҳукуматини коронавируснинг бутун дунёга тарқалишида айбдор деб атаган.
Май ва июнь ойларида Америка оммавий ахборот воситаларида коронавирус Ухань шаҳридаги лабораторияда яратилганидан далолат берувчи белгилар ҳақида материаллар пайдо бўла бошлади. Хабарларга кўра, олимлар SARS-CoV-2 коронавирусидан табиий пайдо бўладиган коронавирусда қайд этилмаган генетик изларни топган.
Шунингдек, британиялик ва норвегиялик олимлар COVID-19 одамлар томонидан яратилганига оид далиллар борлигини айтган. Уларнинг фикрига кўра, COVID-19 лабораторияда яратилган, шундан сўнг хитойлик олимлар «изларни яшириш учун» вируснинг кўршапалаклардан келиб чиққани тўғрисидаги версияни илгари сурган.
Июнь ойида ЖССТ раҳбари Тедрос Гебрейесус ташкилот COVID-19 келиб чиқиши бўйича текширувнинг иккинчи босқичига тайёргарлик кўраётганини маълум қилганди. Гебрейесус бунинг учун Хитойдан ошкоралик ва ҳамкорлик талаб этилишини айтган.
Изоҳ (0)