AQShda tibbiyot xodimlari koronavirus yuqtirib olgan emlangan va emlanmagan insonlarning o‘pkasini o‘zaro taqqoslab ko‘rdi. Tegishli rentgen tasvirlari KSDK News telekanali orqali e’lon qilingan, deb xabar beradi “Korrespondent.net”.
Suratlarga ko‘ra, emlangan fuqaroning organlari yaxshi holatda bo‘lgan, ikkinchi toifanikiga esa kasallik zarar yetkazgan.
Missuridagi Sent-Luis universiteti qoshidagi kasalxonaning intensiv terapiya bo‘limi rahbari doktor Gassan Kamelning so‘zlariga ko‘ra, rentgen tasvirlaridagi sog‘lom o‘pka qora rangda bo‘lishi kerak, chunki to‘qima va suyaklar o‘rtasidagi qora farq organlar kislorodga to‘la ekanligi va yaxshi ishlayotganidan dalolat beradi.
Koronavirusga qarshi emlanmagan bemorlarning organlari tasvirda sutsimon-oq ko‘rinish olgan. Shifokorning aytishicha, bu shikastlanishlar, balg‘am to‘planishi va kislorod yetishmasligi kabi muammolar mavjudligidan dalolat beradi.
Kamelning fikricha, bu darajadagi bemornining hayotini saqlab qolish uchun uni kislorod balloniga yoki hayotni ta’minlovchi apparatga ulash kerak bo‘ladi.
Shifokor koronavirus yondosh kasalliklari bor keksalar uchun xavfli ekanligini eslatib o‘tgan. Shunga qaramay, uning bemorlarini aksariyati infeksiyaga qarshi emlanmagan.
Avvalroq avstraliyalik tadqiqotchilar qora sedana koronavirus infeksiyasini davolashda foydali ekanini isbotlagani to‘g‘risida xabar berilgandi.
Izoh (0)