5-avgust kuni futbol olamini larzaga solgan holat ro‘y berdi. Bu haqda voqea yuz berishidan bir necha soat oldin tasavvur ham qilib bo‘lmasdi. “Barselona” Messining otasi bilan shartnoma borasida kelishib olish uchun uchrashgan vaqtda Leoning jamoani tark etgani haqidagi xabarlar tarqaldi.
“Barselona” darhol sababni keltirdi: “Tomonlar kelishuvga erishganiga qaramasdan, moliyaviy va tizimli to‘siqlar tufayli shartnoma imzolanmadi (La Liga qoidasi)”.
Messi maoshining 50 foizi qisqarishiga rozi edi, ammo “Barselona”ga La Liganing maosh borasidagi qoidalari qattiq to‘sqinlik qildi
1. Iyul oyining o‘rtasida Messi 5 yillik shartnoma imzolashi, unga ko‘ra maoshining 50 foizi qisqarishi aytilgan edi. Bu haqida barcha nashrlar, jumladan, Kataloniyaning Diario Sport va Madridning Marca nashrlari ham yozgandi.2. 2013-yildan buyon Primerada jamoalarida xarajatlar chegarasi mavjud: La Liga moliyaviy hisobotlarga tayanib, har bir futbolchi va murabbiyga qancha maosh tayinlanishini belgilaydi. 2019/20-yilgi mavsumda “Barselona” uchun 671 million yevro xarajat qilishga ruxsat berildi, koronavirus pandemiyasidan so‘ng 2020/21-yilgi mavsumda esa bu ko‘rsatkich 347 millionga tushirildi. Yangi mavsumda esa qancha xarajat qilish mumkinligi hali e’lon qilinmadi, ammo nashrlar keskin pasayish — 200 million yevro bo‘lishi mumkinligini taxmin qildi. Diario Sport iyul oyida “Vilyarreal” yoki “Atletik” kabi jamoalar uchun chegara 150—160 million yevro bo‘lishi mumkinligini yozdi.
3. Bu qoida “Barselona” jamoaviy xarajatlarini keskin kamaytirishi lozimligiga ishora edi. Demak, yirik shartnomaga ega futbolchilardan qutulish lozim. “4:1” ko‘rinishidagi yana bir qat’iy qoida ham mavjud: har bir ishlab olingan 100 million yevroning 25 millionini sarf qilishga ruxsat bor.
“Barselona” yulduzlarini qo‘yib yuborishni istamadi, lekin ular bilan kelishib bo‘lmadi, Tebas esa o‘z pozitsiyasida qoldi
4. “Barselona” rahbariyati yetakchilarini qurbon qilmasdan qoidaga amal qilmoqchi edi. Xosep Bartomeu Barca Corporate’ni (media biznes, savdo-sotiq bo‘yicha shaxsiy kompaniya — “Barsa” klub do‘konlarini o‘zi yurgizadi) 500 million yevroga sotmoqchi edi. Ammo 200 millionga xaridor chiqdi. Bu esa o‘zini oqlamasdi.5. “Barselona” La Liga va uning prezidenti Xavyer Tebas bilan kelishmoqchi edi — buning ham iloji bo‘lmadi. “Messi borasidagi qarorni men emas, “Barselona” qabul qiladi — ular moliyaviy vaziyatdan kelib chiqishlari lozim. Messi ‘Barsa’da qolsa, xursand bo‘laman, lekin bu yerda men hech qanday yordam bera olmayman”, — degandi Tebas.
Endi esa “Barselona” Tebasga shantaj uyushtirmoqda degan nazariya mavjud. Messining shartnomasi haqidagi xabardan so‘ng “Barselona” darhol “Real” bilan aloqaga chiqdi. Maqsad — La Ligaga qarshi “urush”.
6. “Barselona” La Liganing (tashkilot chegara kerakligi, chunki juda katta xarajatlar klublarni xavf ostiga qo‘yishini aytmoqda) qat’iy siyosatiga qarshi. “Barselona”ning bayonoti Tebasga bo‘lgan bosimdan boshqa narsa ekanligini istisno qilib bo‘lmaydi, bu Liga prezidentining taslim bo‘lishiga va asosiy yulduzni yo‘qotishdan qo‘rqib talablarni yumshatishga majbur qilishi mumkin (Krishtianu Ronaldu Italiyada, Serxio Ramos Fransiyada, endi Messini yo‘qotish xavfi paydo bo‘ldi). Bunday taxminiy nazariya muxlislar va jurnalistlar orasida yangrayapti.7. La Liga investitsion fond — CVC bilan katta shartnoma imzolagan edi, unga ko‘ra 10% biznes 2,7 milliard yevroga sotib yuborilgan, 90% pullar klublarga berilishi ko‘zda tutilgandi.
“Barselona”ning ulushi eng kattasi edi — 253,81 million yevro. Lekin uning barchasini Messining shartnomasiga sarflash mumkin emas. La Liga darhol pullarni taqsimladi: 15% futbolchilar uchun (“Barselona” holatida bu 38 million yevroni tashkil qiladi), 15% qarzlarga va 70% infrastruktura, yangi texnologiyalarga sarflanishi lozim. Aynan mana shu taqsimot top-jamoalar va La Liga o‘rtasidagi nizolarga sabab bo‘ldi.
8. Shartnomaning bir qismi sifatida CVC fondi La Liga biznesining 10% qismini X yildan so‘ng foyda bilan qayta sotish maqsadida oldi. Marca’ning ma’lumotlariga ko‘ra, “Barselona” prezidenti Xoan Laporta bu masala bo‘yicha oxirgi bir yarim oyda 5 marotaba Tebas bilan uchrashgan va rozilik bergan. Ammo so‘nggi kunlarda kataloniyaliklarning kayfiyati keskin o‘zgardi — chunki muzokaralardan chetlatilgan “Real” (Peres va Tebas o‘rtasida ancha vaqtdan buyon sovuq urush hukmron, ular doim bir-birining taklifini e’tiborsiz qoldiradi) bu vaziyatni kuzatib turdi va qarshi hujum uchun sabab qilib oldi. “Real” La Liga bilan sudlashishni rejalashtirmoqda va bu kelishuvni bekor qilish istagida. Marca nashrining taxminiga ko‘ra — CVC bilan kelishuvga erishish madridliklarning Superliga borasidagi istaklarini cheklaydi.
20:15 da, “Barselona” Messi haqidagi xabarni e’lon qilishidan 36 daqiqa avval, madridliklar rasmiy saytida quyidagilarni yozdi:
- Kelishuv “Real”ning ishtirokisiz amalga oshirildi.
- Klublar audio-vizual huquqlarini 3 yilga sotdi, lekin liganing fond bilan kelishuviga ko‘ra bu huquq 50 yilga mo‘ljallangan, bu noqonuniy hisoblanadi.
- Muzokaralar raqobatbardosh bo‘lmagan, bitim shartlari fondga yiliga 20% daromad olishni kafolatlaydi — aynan shu fond bilan hamkorlikni A Seriya va Bundesliga rad etgandi.
- Shartnoma qiymati uning uzoq davomiyligi va ko‘lamiga mos kelmaydi (keyingi 50 yilda u barcha jamoalarning media huquqlariga ta’sir ko‘rsatishi mumkin).
- Yarim asrlik shartnomani futboldagi noaniqliklar tufayli ahamiyatsiz deb hisoblaymiz.
- Biz tashkiliy jarayondan hayratdamiz — bir nechta klublarning, jumladan, “Barselona”ning fikri inobatga olinmagan.
Izoh (0)