Rossiyada videomurojaat orqali majburiy mehnatdan ozod qilinishini so‘ragan 6 nafar o‘zbekistonlikka yordam berildi. Bu haqda Tashqi mehnat migratsiyasi agentligi xabar berdi.
Ma’lum qilinishicha, ular 2021-yilning may oyida og‘zaki kelishuv asosida Rossiyaning Samara viloyatidagi issiqxonada vaqtincha mehnat faoliyatini amalga oshirish uchun borgan.
Ish beruvchi ushbu fuqarolarning pasportlarini olib, patent rasmiylashtirgan, lekin hujjatlarini qaytarib bermagan. Shuningdek, oldindan kelishilgan har oy uchun 40 ming rubl ish haqlarining 3 oyligi berilmagan.
Mehnat migrantlari Tashqi mehnat migratsiyasi agentligining Samara viloyatidagi vakolatxonasiga videomurojaat orqali pasportlarini olib berib, majburiy mehnatdan ozod qilinishini so‘ragan.
Vakolatxona xodimlari Samara viloyati Kinel shahri ichki ishlar boshqarmasiga fuqarolarni majburiy mehnatdan ozod qilishda yordam so‘rab, ariza yozgan. Muammo o‘rganilgan va qisqa muddatda ichki ishlar xodimlari bilan birgalikda ularning ish joylariga borib, muammolari hal etilgan.
Bundan avval Rossiyada majburiy mehnatga jalb qilingan va jarohatlangan fuqarolar O‘zbekistonga olib kelingani haqida xabar berilgan edi. Ular orasida Samara viloyatidagi issiqxonada majburiy mehnatga jalb qilingan er-xotin ham bor.
Mavzuga doir:
- “Bizni sotib yuborganmisizlar?” — Tashqi mehnat migratsiyasi agentligi tomonidan Rossiyaga ishlash uchun yuborilgan o‘zbekistonliklar shikoyat bilan chiqdi
- “Ular bir soat uchun berilgan ish haqini bir kunlik deb noto‘g‘ri tushungan”. Rossiyada ish sharoitidan norozi muhojirlar yuzasidan izoh berildi
- Senat Rossiyaga ishlash uchun ketgan o‘zbekistonliklarning videomurojaati yuzasidan o‘rganish natijalarini e’lon qildi
Izoh (0)