Tehron shahrida bo‘lib turgan O‘zbekiston Oliy Majlisi Qonunchilik palatasi spikeri Nurdinjon Ismoilov boshchiligidagi parlament delegatsiyasi Eronning yangi saylangan prezidenti Ibrohim Raisiy bilan uchrashdi. Bu haqda parlament quyi palatasi matbuot xizmati xabar berdi.
Uchrashuvda Eron davlat rahbari O‘zbekiston Prezidenti Shavkat Mirziyoyev tomonidan uning saylovlardagi g‘alabasi munosabati bilan yo‘llagan samimiy tabrigi uchun o‘z minnatdorligini bildirgan. Shuningdek, bunday yuksak e’tibor va e’tirof ikki davlat o‘rtasidagi munosabatlarni yangi bosqichda davom ettirish uchun muhim omil bo‘lib xizmat qilishi ta’kidlangan.
Muloqotlarda O‘zbekiston va Eron o‘rtasidagi ko‘p tomonlama aloqalarni izchil rivojlantirish, savdo-iqtisodiy, ijtimoiy-madaniy sohalar qatori parlamentlararo hamkorlikni yanada chuqurlashtirish yuzasidan fikr almashilgan.
Ibrohim Raisiyning ta’kidlashicha, Eron rasmiy doiralari Shavkat Mirziyoyev tomonidan ilgari surilayotgan mintaqa davlatlari bilan o‘zaro hurmat, do‘stlik va birodarlik tamoyillariga asoslangan yaqin qo‘shnichilik aloqalarini yanada mustahkamlash hamda mintaqaviy xavfsizlikni ta’minlashga qaratilgan tashabbuslarini har tomonlama qo‘llab-quvvatlaydi.
Shuningdek, Eron prezidenti Toshkent va Tehron o‘rtasida yo‘lga qo‘yilgan xalqaro va mintaqaviy tashkilotlar doirasida, jumladan, Shanxay hamkorlik tashkiloti doirasidagi o‘zaro manfaatli va samarali hamkorlik aloqalariga ijobiy baho bergan.
Ibrohim Raisiy fikriga ko‘ra, O‘zbekistonda Prezident tomonidan amalga oshirilayotgan islohotlar mamlakatning ijtimoiy hayotida parlament rolini nihoyatda kuchaytirdi. Kelgusida ikki mamlakat o‘rtasidagi savdo-iqtisodiy, investitsiyaviy va madaniy-gumanitar yo‘nalishlardagi hamkorlikni yanada kengaytirish va mustahkamlashda parlamentlararo munosabatlar muhim o‘rin tutadi.
Eslatib o‘tamiz, Eronda 18-iyun kuni prezidentlik saylovi bo‘lib o‘tdi. Saylov 19-iyun kuni soat 02:00 da (Toshkent vaqti bilan soat 02:30) yakunlangan. Ovoz berish 18-iyun kuni soat 07:00 da (Toshkent vaqti bilan soat 07:30) boshlanib, yarim tungacha davom etishi kerak edi, ammo ajratilgan vaqtda hamma ovoz berishga ulgurmagani uchun saylov uchastkalarining ishlash vaqti uzaytirilgandi. Eron Oliy sudi raisi Ibrohim Raisiy 17,9 million kishi (saylovchilarning 62 foizi)ning ovozini qo‘lga kiritib, mamlakat prezidenti etib saylandi.
Izoh (0)