Toshkent shahar Yunusobod tumani hokimining “Yunusobod tumani ‘Otchopar-2’ mahalla fuqarolar yig‘ini hududida tashkil etilayotgan mavzega ‘Manzara’ nomini berish to‘g‘risida”gi qarori loyihasi muhokamaga qo‘yildi.
Loyihaga muvofiq, qaror qabul qilingach, “Otchopar-2” mahalla fuqarolar yig‘ini hududida yangi tashkil etilayotgan mavzega “Manzara” nomi aks etgan nomlagichlar o‘rnatiladi va tegishli hujjatlarga o‘zgartirish kiritiladi.
Xalq deputatlari Yunusobod tuman kengashining Ijtimoiy-madaniy sohani rivojlantirish, oila, xotin-qizlar va yoshlar masalalari hamda Sanoat, transport, qurilish, aloqa va aholiga xizmatlar ko‘rsatish masalalari bo‘yicha doimiy komissiyalari hujjat ijrosini nazorat qiladi.
Ushbu loyiha “Geografik obyektlarning nomlari to‘g‘risida”gi qonunning 10-moddasi, Vazirlar Mahkamasining 2012-yil 16-oktabrdagi “‘Geografik obyektlarning nomlari to‘g‘risida’gi O‘zbekiston Respublikasi qonuniga muvofiq, geografik obyektlarning nomlari sohasidagi ishlarni tartibga solish chora-tadbirlari to‘g‘risida”gi qarori asosida amalga oshirilmoqda.
Eslatib o‘tamiz, 2020-yilning mayida O‘zbekiston Prezidentining tashabbusi bilan Choshtepa va Qipchoq mavzelari negizida Toshkent shahar hokimligiga to‘g‘ridan to‘g‘ri bo‘ysunadigan alohida Yangi hayot kichik tumani tashkil etilgandi.
Izoh (0)