Россияда видеомурожаат орқали мажбурий меҳнатдан озод қилинишини сўраган 6 нафар ўзбекистонликка ёрдам берилди. Бу ҳақда Ташқи меҳнат миграцияси агентлиги хабар берди.
Маълум қилинишича, улар 2021 йилнинг май ойида оғзаки келишув асосида Россиянинг Самара вилоятидаги иссиқхонада вақтинча меҳнат фаолиятини амалга ошириш учун борган.
Иш берувчи ушбу фуқароларнинг паспортларини олиб, патент расмийлаштирган, лекин ҳужжатларини қайтариб бермаган. Шунингдек, олдиндан келишилган ҳар ой учун 40 минг рубль иш ҳақларининг 3 ойлиги берилмаган.
Меҳнат мигрантлари Ташқи меҳнат миграцияси агентлигининг Самара вилоятидаги ваколатхонасига видеомурожаат орқали паспортларини олиб бериб, мажбурий меҳнатдан озод қилинишини сўраган.
Ваколатхона ходимлари Самара вилояти Кинел шаҳри ички ишлар бошқармасига фуқароларни мажбурий меҳнатдан озод қилишда ёрдам сўраб, ариза ёзган. Муаммо ўрганилган ва қисқа муддатда ички ишлар ходимлари билан биргаликда уларнинг иш жойларига бориб, муаммолари ҳал этилган.
Бундан аввал Россияда мажбурий меҳнатга жалб қилинган ва жароҳатланган фуқаролар Ўзбекистонга олиб келингани ҳақида хабар берилган эди. Улар орасида Самара вилоятидаги иссиқхонада мажбурий меҳнатга жалб қилинган эр-хотин ҳам бор.
Мавзуга доир:
- «Бизни сотиб юборганмисизлар?» — Ташқи меҳнат миграцияси агентлиги томонидан Россияга ишлаш учун юборилган ўзбекистонликлар шикоят билан чиқди
- «Улар бир соат учун берилган иш ҳақини бир кунлик деб нотўғри тушунган». Россияда иш шароитидан норози муҳожирлар юзасидан изоҳ берилди
- Сенат Россияга ишлаш учун кетган ўзбекистонликларнинг видеомурожаати юзасидан ўрганиш натижаларини эълон қилди
Изоҳ (0)