Ijtimoiy tarmoqlarda Qashqadaryo viloyati Shahrisabz shahridagi shifoxonaga emlash uchun borgan erkakni eshikdan haydab yuborishgani haqida ma’lumotlar tarqaldi. Viloyat sog‘liqni saqlash boshqarmasi bu voqeaga izoh berdi.
Qayd etilishicha, 26-iyul kuni fuqaro 1-oilaviy poliklinika emlash markaziga koronavirus infeksiyasiga qarshi emlanish uchun murojaat qilgan. Erkak o‘zi va qarindoshlari uchun 5 ta “Sputnik V” vaksinasini talab qilgan.
“Tibbiyot xodimlari mazkur turdagi vaksina avval shunday vaksina bilan emlanganlarga taqsimot qilib bo‘linganidan so‘ng berilishini, mazkur emlash punktida o‘sha paytda fuqarolar ZF-UZ-VAS 2001 va “AstraZeneca” bilan emlanayotganini tushuntirishga harakat qilgan. Ammo fuqaro ularning gaplariga quloq solmasdan janjal ko‘targan”, – deyiladi xabarda.
Ma’lumotlarga ko‘ra, 2 ta hamshiraga fuqaro bilan muloqotda deontologiya qoidalariga rioya qilmagani uchun intizomiy jazo qo‘llanilgan.
Bundan avval Shavkat Mirziyoyev pandemiyadan imkon qadar yo‘qotishlarsiz o‘tish uchun fuqarolar qat’iy amal qilishi talab etiladigan uch muhim shartni aytgani, Shavkat Mirziyoyev O‘zbekistonda majburiy emlashni nazarda tutuvchi qonunni imzolagani hamda O‘zbekistonda koronavirusga qarshi qo‘llanilgan vaksinalar soni 8 mln dozadan oshgani haqida xabar berilgandi.
Izoh (0)