Toshkent ko‘chalarida qasddan qo‘pol qoidabuzarlik sodir etgan haydovchilar javobgarlikka tortildi, deb xabar beradi poytaxt IIBB axborot xizmati.
Ijtimoiy tarmoqlarda davlat raqam belgilari bo‘lmagan, ruxsat etilmagan moslama o‘rnatilgan Lacetti avtomobillari haydovchilari qo‘pol qoidabuzarlik sodir etib, harakatlanayotgani tasivrlangan video tarqaldi.
Video yuzasidan Toshkent shahar IIBB YHXB xodimlari tomonidan tezkor surishtiruv harakatlari olib borilgan.
Ma’lum bo‘lishicha, ushbu voqea 28-iyul kuni soat 14:00 larda Shayxontohur tumani Nurafshon ko‘chasida sodir bo‘lgan. Qoidabuzarlikda ishtirok etgan barcha haydovchilar shaxsiga aniqlik kiritilib, o‘rnatilgan tartibda bayonnomalar tuzilgan va avtomobillar vaqtincha saqlash uchun jarima maydonchasiga joylashtirilgan.
Shuningdek, bo‘lib o‘tgan voqea yuzasidan jamoatchilik muhokamasi tashkil etilgan. Unda Toshkent shahar IIBB YHXB rahbariyati, shahar prokuraturasi, mahalla faollari, aybdorlarning o‘zlari hamda ularning ota-onalari ishtirok etgan.
“Raqamlarni yechib olib, nimani isbotlamoqchi bo‘ldinglar? Sizlar qasddan hech narsani mensimagansizlar. Orqamacha harakatlanishga kim haq-huquq berdi sizlarga?”, — deydi poytaxt IIBB YHXB boshlig‘i o‘rinbosari Qudratilla Yo‘ldoshev.
Muhokamada ishtirok etgan “Islomobod” MFY raisi Serikboy Useyenov ham so‘zga chiqib, qoidabuzlarning har biri xalqning oldida javob berishi kerakligini aytgan: “Bular hali firmalarda ishlab, katta pul topadigan bolalar emas, otasining orqasida yurgan bolalar”. Muhokamalar davomida qoidabuzarlarning ota-onalari farzandlari qilgan ishidan kechirim so‘ragan.
Avvalroq Toshkentda Spark ustida sherigini bog‘lab, TikTok’ka rolik suratga olgan blogerlar 10 sutkaga qamalgani, Toshkentda YPX xodimiga bo‘ysunmay, “bor yo‘qol” deb yo‘lida davom etgan haydovchining Equinox’i jarima maydonchasiga joylashtirilgani, Toshkentda yo‘lning qatnov qismida drift qilgan haydovchiga chora ko‘rilgani to‘g‘risida xabar berilgandi.
Izoh (0)