Ижтимоий тармоқларда Қашқадарё вилояти Шаҳрисабз шаҳридаги шифохонага эмлаш учун борган эркакни эшикдан ҳайдаб юборишгани ҳақида маълумотлар тарқалди. Вилоят соғлиқни сақлаш бошқармаси бу воқеага изоҳ берди.
Қайд этилишича, 26 июль куни фуқаро 1-оилавий поликлиника эмлаш марказига коронавирус инфекциясига қарши эмланиш учун мурожаат қилган. Эркак ўзи ва қариндошлари учун 5 та «Спутник V» вакцинасини талаб қилган.
«Тиббиёт ходимлари мазкур турдаги вакцина аввал шундай вакцина билан эмланганларга тақсимот қилиб бўлинганидан сўнг берилишини, мазкур эмлаш пунктида ўша пайтда фуқаролар «ZF-UZ-VAC» 2001 ва «AstraZeneca» билан эмланаётганини тушунтиришга ҳаракат қилган. Аммо фуқаро уларнинг гапларига қулоқ солмасдан жанжал кўтарган», – дейилади хабарда.
Маълумотларга кўра, 2 та ҳамширага фуқаро билан мулоқотда деонтология қоидаларига риоя қилмагани учун интизомий жазо қўлланилган.
Бундан аввал Шавкат Мирзиёев пандемиядан имкон қадар йўқотишларсиз ўтиш учун фуқаролар қатъий амал қилиши талаб этиладиган уч муҳим шартни айтгани, Шавкат Мирзиёев Ўзбекистонда мажбурий эмлашни назарда тутувчи қонунни имзолагани ҳамда Ўзбекистонда коронавирусга қарши қўлланилган вакциналар сони 8 млн дозадан ошгани ҳақида хабар берилганди.
Изоҳ (0)