«Отасининг орқасида юрган болалар». Тошкентда Lacetti’ларни орқамача ҳайдаганларнинг хулқи улар яшайдиган маҳаллада муҳокама қилинди

Тошкент кўчаларида қасддан қўпол қоидабузарлик содир этган ҳайдовчилар жавобгарликка тортилди, деб хабар беради пойтахт ИИББ ахборот хизмати.

Ижтимоий тармоқларда давлат рақам белгилари бўлмаган, рухсат этилмаган мослама ўрнатилган Lacetti автомобиллари ҳайдовчилари қўпол қоидабузарлик содир этиб, ҳаракатланаётгани тасиврланган видео тарқалди.

Видео юзасидан Тошкент шаҳар ИИББ ЙҲХБ ходимлари томонидан тезкор суриштирув ҳаракатлари олиб борилган.

Маълум бўлишича, ушбу воқеа 28 июль куни соат 14:00 ларда Шайхонтоҳур тумани Нурафшон кўчасида содир бўлган. Қоидабузарликда иштирок этган барча ҳайдовчилар шахсига аниқлик киритилиб, ўрнатилган тартибда баённомалар тузилган ва автомобиллар вақтинча сақлаш учун жарима майдончасига жойлаштирилган.

Шунингдек, бўлиб ўтган воқеа юзасидан жамоатчилик муҳокамаси ташкил этилган. Унда Тошкент шаҳар ИИББ ЙҲХБ раҳбарияти, шаҳар прокуратураси, маҳалла фаоллари, айбдорларнинг ўзлари ҳамда уларнинг ота-оналари иштирок этган.

«Рақамларни ечиб олиб, нимани исботламоқчи бўлдинглар? Сизлар қасддан ҳеч нарсани менсимагансизлар. Орқамача ҳаракатланишга ким ҳақ-ҳуқуқ берди сизларга?», — дейди пойтахт ИИББ ЙҲХБ бошлиғи ўринбосари Қудратилла Йўлдошев.

Муҳокамада иштирок этган «Исломобод» МФЙ раиси Серикбой Усеенов ҳам сўзга чиқиб, қоидабузларнинг ҳар бири халқнинг олдида жавоб бериши кераклигини айтган: «Булар ҳали фирмаларда ишлаб, катта пул топадиган болалар эмас, отасининг орқасида юрган болалар». Муҳокамалар давомида қоидабузарларнинг ота-оналари фарзандлари қилган ишидан кечирим сўраган.

Аввалроқ Тошкентда Spark устида шеригини боғлаб, TikTok’ка ролик суратга олган блогерлар 10 суткага қамалгани, Тошкентда ЙПХ ходимига бўйсунмай, «бор йўқол» деб йўлида давом этган ҳайдовчининг Equinox’и жарима майдончасига жойлаштирилгани, Тошкентда йўлнинг қатнов қисмида дрифт қилган ҳайдовчига чора кўрилгани тўғрисида хабар берилганди.