“Barcha vaksinalarning vazifasi bir xil. Faqat falon vaksinadan olaman, deb kutib turish eng xato yo‘l” — E’zozbek Rizayev

Sog‘liqni saqlash vazirligi huzuridagi Koronavirusga qarshi kurashish shtabi a’zosi E’zozbek Rizayev qaysi vaksinani olishdan qat’i nazar, ularning bajaradigan vazifasi bir xilligini, “Faqatgina falon vaksinadan olaman”, deb kutib turish eng xato yo‘lligini aytdi.

“Barcha vaksinaning ishlash mexanizmi bir xil: virusdan inson hujayrasiga yopishib oladigan oqsil ajratib olinib, bu namuna orqali inson hujayralarida virusga qarshi antitanalarni shakllantirishdir. Vaksina qayerda ishlab chiqarilgan bo‘lmasin, uning vazifasi organizmda ana shu antitanachalarni paydo qilishdir”, — degan u SSV matbuot xizmati “O‘zbekiston 24” telekanali bilan hamkorlikda tashkillashtirgan “COVID-19: Savol-javob” teleloyihasida.

Shuningdek, uning so‘zlariga ko‘ra, ba’zilar birinchi bosqichda o‘zbek-xitoy vaksinasini olgandim, ikkinchi bosqichda Moderna olsam bo‘ladimi, degan savollar bilan murojaat qilmoqda. Agar o‘zbek-xitoy vaksinasida emlash amalga oshirilgan bo‘lsa, bu 3 bosqichda bo‘ladi. O‘zbekistonga keltirilgan boshqa barcha vaksinalar 2 bosqichda amalga oshiriladi. Bu vaksinalar bilan emlashning har bir bosqichida alohida ilmiy tekshiruvlar o‘tkazilgan. Bosqichlar ketma-ketligi saqlansagina, to‘liq emlanish amalga oshirilgan, deb xulosa qilinadi.

“Lekin bugun fanda bir vaksinani boshqasi bilan qo‘shib emlash nima oqibatga olib kelishi to‘g‘risida ma’lumot yo‘q. Shuning uchun o‘zboshimchalik bilan qaror qabul qilishga haqqimiz ham yo‘q. Bir necha xil vaksina bilan emlanish natijasida nojo‘ya ta’sirlar ko‘rinishi xavfi bor. Shu sababli yurtdoshlarimizdan o‘z hayotini xavf ostiga qo‘ymasliklarini so‘rab qolamiz.

Ammo kimdir boshqa vaksina bilan emlanishni istasa, bir vaksinaning to‘liq dozalarini qabul qilganidan 6 oy o‘tgach, boshqa istagan vaksina bilan bir marta emlanish orqali avval shakllangan antitanalar miqdorini saqlab turishi mumkin”, — degan Koronavirusga qarshi kurashish shtabi a’zosi E’zozbek Rizayev.

Sog‘liqni saqlash vazirligi statistikasiga ko‘ra, O‘zbekistonda koronavirusga qarshi qo‘llanilgan vaksinalar soni 8 million dozadan oshdi. Emlash jarayoniga qamrab olingan jami aholi soni 5 231 451 nafarni, shu kungacha koronavirusga qarshi to‘liq emlab bo‘linganlar soni esa 1 232 807 nafarni tashkil qilmoqda.

Ma’lumotga ko‘ra, 2021-yilda xarid qilingan barcha vaksinalarga 44 million 761,5 ming dollar sarflangan. Ulardan o‘zbek-xitoy vaksinasiga 39 million 100 ming dollar, “Sputnik V” vaksinasiga 3 million 681,5 ming dollar va AstraZeneca vaksinasiga 1 million 980 ming dollar sarflangan.

30-iyul kuni O‘zbekistonga koronavirusga qarshi 3 million 60 doza Moderna vaksinasi olib kelindi. O‘zbekistonga 1,2 million dozada Pfizer vaksinasi ham olib kelinishi kutilmoqda.