Surxondaryoda 19 yilga qamalgan mahbusni 70 ming dollarga mansabdor tanishi orqali chiqarib bermoqchi bo‘lgan shaxs ushlandi. Bu haqda “Yoshlar” telekanalining “Yangi davr” informatsion dasturida ma’lum qilindi.
Ma’lum qilinishicha, 2021-yilning 9-iyul kuni Surxondaryo viloyatida huquqni muhofaza qiluvchi organ xodimlari bilan hamkorlikda tezkor tadbir o‘tkazilgan. Tadbirda Sho‘rchi tumanida yashovchi muqaddam sudlangan 32 yoshli fuqaro termizlik 38 yoshli tanishidan 10 yildan beri Koson tumanidagi qamoqxonada jazoni o‘tayotgan mahkumni ozodlikka chiqarish uchun 70 ming so‘ragan.
E. ismli ushbu fuqaro tanishini IIV Jazoni ijro etish departamentida yaqin tanishi ishlashini aytib, ishontirgan.
Shundan so‘ng tezkor tadbir natijasida E. so‘ralgan puldan 25 ming dollarni Toshkent shahrida olayotgan vaqtda ushlandi.
Hozirda mazkur holat yuzasidan E.ga nisbatan Jinoyat kodeksining 168-moddasi (firibgarlik) 4-qismi va 211-moddasi (pora berish) 1-qismi bilan jinoyat ishi qo‘zg‘atilgan.
Avvalroq O‘zbekiston IIV akademiyasi qoshidagi serjantlar tayyorlash maktabiga o‘qishga kiritib qo‘yish evaziga fuqarodan 13 ming dollar talab qilgan shaxs qo‘lga olingani, Surxondaryoda 50 sotix yerni o‘ziga tegishli ekanligiga ishontirib, 150 million so‘mga sotmoqchi bo‘lgan shaxs ushlangani to‘g‘risida xabar berilgandi.
Izoh (0)