Surxondaryoning “Termiz” tog‘ poligonida O‘zbekiston—Rossiya hamkorligidagi mashg‘ulotlarga start berildi. Bu haqda Rossiya Mudofaa vazirligi matbuot xizmati xabar berdi.
Tadbir ikki davlat harbiy xizmatchilarining saflanishidan boshlangan. Shundan so‘ng O‘zbekiston va Rossiya davlat bayroqlari madhiyalar sadosi ostida tantanali ravishda ko‘tarilgan.
Marosim davomida O‘zbekiston mudofaa vazirining jangovar tayyorgarlik bo‘yicha o‘rinbosari polkovnik Qodir Tursunov hamda Rossiya Markaziy harbiy okrugi shtabi boshlig‘ining o‘rinbosari general-mayor Nikolay Tereshchenko so‘zga chiqib, harbiylarga muvaffaqiyatli hamkorlik tilagan. Ular qo‘shma mashg‘ulotlar ikki tomonlama hamkorlikni yanada mustahkamlashiga ishonch bildirgan.
Shundan keyin tadbir ishtirokchilari Termiz bazasi parad maydoni bo‘ylab yurishni amalga oshirgan.
5 kun davom etadigan mashg‘ulotlarga Rossiya va O‘zbekiston qurolli kuchlarining 1,5 mingga yaqin harbiy xizmatchilari jalb qilingan. Rossiya harbiy xizmatchilari mezbon tomonidan berilgan zirhli mashinalarda vazifalarni bajaradi.
Avvalroq Tojikistonda 5—10-avgust kunlari Tojikiston, O‘zbekiston va Rossiya qo‘shinlari ishtirokida uch tomonlama mashg‘ulotlar o‘tkazilishi to‘g‘risida xabar berilgandi. 2-avgust kuni O‘zbekiston Mudofaa vazirligi bo‘linmasi mashg‘ulot o‘tkaziladigan joyga kolonnada yurishni amalga oshirgan. Qo‘shni davlat hududida kolonnada yurishlariga O‘zbekiston havo kuchlarining “Mi-35” jangovar vertolyotlari hamrohlik qilgan.
Mavzuga doir:
Izoh (0)