«Барча вакциналарнинг вазифаси бир хил. Фақат фалон вакцинадан оламан, деб кутиб туриш энг хато йўл» — Эъзозбек Ризаев

Соғлиқни сақлаш вазирлиги ҳузуридаги Коронавирусга қарши курашиш штаби аъзоси Эъзозбек Ризаев қайси вакцинани олишдан қатъи назар, уларнинг бажарадиган вазифаси бир хиллигини, «Фақатгина фалон вакцинадан оламан», деб кутиб туриш энг хато йўллигини айтди.

«Барча вакцинанинг ишлаш механизми бир хил: вирусдан инсон ҳужайрасига ёпишиб оладиган оқсил ажратиб олиниб, бу намуна орқали инсон ҳужайраларида вирусга қарши антитаналарни шакллантиришдир. Вакцина қаерда ишлаб чиқарилган бўлмасин, унинг вазифаси организмда ана шу антитаначаларни пайдо қилишдир», — деган у ССВ матбуот хизмати «Ўзбекистон 24» телеканали билан ҳамкорликда ташкиллаштирган «COVID-19: Савол-жавоб» телелойиҳасида.

Шунингдек, унинг сўзларига кўра, баъзилар биринчи босқичда ўзбек-хитой вакцинасини олгандим, иккинчи босқичда Moderna олсам бўладими, деган саволлар билан мурожаат қилмоқда. Агар ўзбек-хитой вакцинасида эмлаш амалга оширилган бўлса, бу 3 босқичда бўлади. Ўзбекистонга келтирилган бошқа барча вакциналар 2 босқичда амалга оширилади. Бу вакциналар билан эмлашнинг ҳар бир босқичида алоҳида илмий текширувлар ўтказилган. Босқичлар кетма-кетлиги сақлансагина, тўлиқ эмланиш амалга оширилган, деб хулоса қилинади.

«Лекин бугун фанда бир вакцинани бошқаси билан қўшиб эмлаш нима оқибатга олиб келиши тўғрисида маълумот йўқ. Шунинг учун ўзбошимчалик билан қарор қабул қилишга ҳаққимиз ҳам йўқ. Бир неча хил вакцина билан эмланиш натижасида ножўя таъсирлар кўриниши хавфи бор. Шу сабабли юртдошларимиздан ўз ҳаётини хавф остига қўймасликларини сўраб қоламиз.

Аммо кимдир бошқа вакцина билан эмланишни истаса, бир вакцинанинг тўлиқ дозаларини қабул қилганидан 6 ой ўтгач, бошқа истаган вакцина билан бир марта эмланиш орқали аввал шаклланган антитаналар миқдорини сақлаб туриши мумкин», — деган Коронавирусга қарши курашиш штаби аъзоси Эъзозбек Ризаев.

Соғлиқни сақлаш вазирлиги статистикасига кўра, Ўзбекистонда коронавирусга қарши қўлланилган вакциналар сони 8 миллион дозадан ошди. Эмлаш жараёнига қамраб олинган жами аҳоли сони 5 231 451 нафарни, шу кунгача коронавирусга қарши тўлиқ эмлаб бўлинганлар сони эса 1 232 807 нафарни ташкил қилмоқда.

Маълумотга кўра, 2021 йилда харид қилинган барча вакциналарга 44 миллион 761,5 минг доллар сарфланган. Улардан ўзбек-хитой вакцинасига 39 миллион 100 минг доллар, «Спутник V» вакцинасига 3 миллион 681,5 минг доллар ва AstraZeneca вакцинасига 1 миллион 980 минг доллар сарфланган.

30 июль куни Ўзбекистонга коронавирусга қарши 3 миллион 60 доза Moderna вакцинаси олиб келинди. Ўзбекистонга 1,2 миллион дозада Pfizer вакцинаси ҳам олиб келиниши кутилмоқда.